א געהויבענע מעמד סיום כתיבת ספר תורה איז פארגעקומען פארגאנגענעם מיטוואך פרשת לך, בביתו נאוה קודש פון האדמו"ר ממונקאטש, פארן ספר תורה וואס איז געשריבן געווארן דורכ'ן רבי'ן שליט"א בהידור רב
מיט עטליכע יאר צוריק האט דער רבי שליט"א אונטערגענומען דעם הייליגן פראיעקט צו לאזן שרייבן א ספר תורה מיט אלע הידורים. אצינד איז דער ספר תורה פארענדיגט געווארן אין א גוטע שעה, און אין א באשיידענע דערהויבענע מעמד זענען צוזאם געקומען די בני המלוכה, די חשובע קינדער און אייניקלעך זרע ברך ה' פון רבי׳ן שליט״א, ווי יעדער באזונדער האט געהאט די געלעגענהייט אריינשרייבן אן אות אין די ס״ת.
דער מעמד איז געקומען צום קלימאקס ווען דער רבי שליט"א אליין האט אריינגעשריבן די לעצטע אותיות, ותשלם המלאכה ונתקדש בקדושת ספר תורה. דער ציבור האט זיך ארויסגעלאזט אין א פרייליכע טאנץ לכבודו של תורה ולשמחת לב פונעם רבי׳ן שליט״א.
לויט׳ן פלאן וועט די ספר תורה ווערן אריינגעגעבן ברוב פאר והדר צום מונקאטשער בית המדרש אין די קומענדיגע תקופה בעזרת השם יתברך.
