שטייענדיג נאנט צום ערשטן יארצייט לתקופת השנה, גרייט מען זיך בהכנה דרבה צום יומא דהילולא קדישא פון כ"ק אדמו"ר הרה"ק מראחמיסטריווקא זי"ע, וואס געפאלט קומענדיגן זונטאג אויפדערנאכט כ"ט אב ערב ראש חודש אלול.
גרויסע הכנות ווערן געמאכט אויפן בית החיים הר שלום ארום דעם מקום מנוחת הקודש, וואו טויזענטער אידן זענען ערווארטעט צו פוקד זיין דעם ציון הק' בעצם יומא דהילולא, און שטייענדיג ביום המסוגל ערב ראש חודש אלול. די קינדער כ"ק האדמורי"ם שליט"א וועלן פוקד זיין דעם ציון הק' יעדער באזונדער, כ"ק אדמו"ר מראחמיסטריווקא שליט"א וועט אנקומען צום ציון הק' ארום צוועלף דרייסיג מיטאג בראש קהל חסידיו.
די צענטראלע מעמד סעודת הילולא רבתי און סיום הש"ס וועט פארקומען אין די גרויסע זאל בבנין תלמוד תורה בעלזא אויף די אכט און דרייסיגסטע סטריט, וואו טויזענטער חסידים וועלן זיך צוזאמקומען און זיך דערווארעמען במשנתו פונעם בעל ההילולא, אונטערן השפעה פון ממשיכי דרכו בקודש כ"ק האדמורי"ם שליט"א לבית ראחמיסטריווקא, וועלכע וועלן אלע אינאיינעם פירן דעם יארצייט טיש במעמד קהל רב.
מטעם קהילה קדושה ראחמיסטריווקא אין בארא פארק, איז ארויסגעשטעלט געווארן א ספעציעלע מודעה מיט די זמנים ווען די קינדער האדמורי"ם וועלן דאווענען מעריב פארן עמוד בעפאר די יארצייט טיש. כ"ק אדמו"ר מראחמיסטריווקא שליט"א וועט דאווענען ביים זמן צאת הכוכבים אין ביהמ"ד הגדול ראחמיסטריווקא אין בארא פארק, און כ"ק אדמו"ר מראחמיסטריווקא לעיקוואד שליט"א וועט דאווענען א האלבע שעה שפעטער אין ביהמ"ד הגדול, אינאיינעם מיטן פלומעניק כ"ק אדמו"ר מראחמיסטריווקא ס"וו שליט"א.
כ"ק אדמו"ר מראחמיסטריווקא וויליאמסבורג שליט"א וועט דאווענען ביים זמן צאת הכוכבים אין די אלטע ביהמ"ד בביתו נאוה קודש פונעם רבי'ן זצ"ל, און כ"ק אדמו"ר מראחמיסטריווקא מאנסי שליט"א וועט דאווענען א האלבע שעה שפעטער אין זעלבן היכל.
כ"ק אדמו"ר מראחמיסטריווקא לינדען שליט"א וועט דאווענען ביים זמן צאת הכוכבים בביתו נאוה קודש פונעם רבי'ן זצ"ל, אין די צימער וואו דער רבי זצ"ל האט צוריקגעגעבן די ריינע נשמה גענוי א יאר פריער. און כ"ק אדמו"ר מראחמיסטריווקא אוקוויין שליט"א וועט דאווענען א האלבע שעה שפעטער אין זעלבן צימער.
צום שלוס פונעם יארצייט טאג מאנטאג פארנאכטס וועט פארקומען נאך עטליכע יארצייט סעודות און טישן בחצרות הקודש ראחמיסטריווקא, אין לעיקוואד וועט פארקומען די יארצייט טיש אינאיינעם מיט די סעודת עניים לקראת די שמחת החתונה פון א אייניקל ביי כ"ק אדמו"ר מראחמיסטריווקא לעיקוואד שליט"א וואס קומט פאר אינעם זעלבן וואך.
