די יהדות החרדית אין לאנדאן ענגלאנד איז איינגעהילט באש להבה, שטייענדיג פעלזן פעסט קעגן די נסיונות הדור, ווען די ראשי הממשלה ווילן ארויפצווינגען א שווערן גזירת החינוך אויף די תלמידי הישיבות הקדושות, און ווי באריכטעט פארלאפענע וואך איז באשטימט געווארן דורך די גדולי רבני העיר אינערהאלב התאחדות קהילות החרדים אז דעם קומענדיגן זונטאג פרשת בשלח וועט פארקומען א גרויסע יום תפילה ותענית וואס וועט ארייננעמען א מאכטפולע כח הרבים, ווען די גאנצע אידישע געמיינדע אין לאנדאן וועט זיך צוזאמנעמען אויף א ריזן עצרת ווי קיינמאל בעפאר.
אין די יעצטיגע טעג איז באשטעטיגט געווארן די גענויע דעטאלן איבער די ריזן עצרת תפלה וואס וועט פארקומען זונטאג פארמיטאג, אין די צייט וואס אלע תושבי העיר וועלן פאסטן א האלבע טאג בהוראת הרבנים. די צענטראלע לאקאל פארן ריזן עצרת איז באשטימט פארצוקומען אין די גיגאנטישע זאל פון יסודי התורה, וואס ווערט אהערגעשטעלט מיט די מאקסימום פלעצער צו קענען אקאמאדירן ווי מער אינגעלייט, בעלי בתים, און זקני העדה. אינדרויסן פון די בנין ווערט אויפגעשטעלט א גיגאנטישע שאטער לענגאויס די גאנצע פארקינג לאט, וואו עס וועט ווערן אויסגעשטעלט נאך טויזענטער זיץ פלעצער פאר די אינגעלייט, וואס וועלן מיטהאלטן לעבעדיג פון אינעווייניג.
הארט דערנעבן בבנין ביהמ"ד הגדול דחסידי באבוב, וועלן זיך צוזאמנעמען די טויזענטער תלמידי הישיבות פון שטאט, סיי אינעם היכל בית המדרש און סיי אין די שטיבלעך און עזרת נשים, און באזונדער וועלן זיך צוזאמנעמען די עלטערע ילדי התלמוד תורה אין ביהמ"ד הגדול וויזניץ אין לאנדאן, וואו כ"ק אדמו"ר מוויזניץ שליט"א פון לאנדאן וועט זיך פערזענליך באטייליגן און מתפלל זיין צוזאמען מיט די תינוקות של בית רבן שלא טעמו טעם חטא.
די מעמד וועט זיך אנהייבן א פערטל צו עלף פארמיטאג, ווען מען וועט אויסזאגן גאנץ ספר תהלים ברציפות מיט א כח הרבים, פארגעזאגט דורך געלונגענע בעלי תפילה. נאכן ענדיגן תהלים ארום האלב נאך צוועלף, וועט מען זאגן די יהי רצון און י"ג מידות, דערנאך וועט מען דאווענען מנחה און ליינען די קריאה פון "ויחל" פונקט ווי א תענית ציבור.
אין די זעלבע צייט וועלן די יונגערע קינדער זיך צוזאמקומען אין די בניני התלמוד תורה, און זאגן פרקי תהלים בהתעוררות רב, אויך די פרויען און מיידלעך וועלן על פי הוראת הרבנים זאגן פרקי תהלים, אינעם זעלבן צייט פון די זמן מסוגל בתפילת הרבים.
פארלאפענע וואך איז פארגעקומען א גרויסע אסיפת הרבנים מיט די באטייליגונג פון צענדליגע רבני העיר, און א ספעציעלע קול קורא איז ערשינען אונטערגעשריבן דורך אלע רבנים ואדמורי"ם לענגאויס די שטאט, וואו זיי רופן דעם ציבור צו זיין א טייל פון די עצרת תפילה ותענית, און מיט א כח הרבים צורייסן די שלעכטע גזירה. באזונדער איז ערשינען א בריוו אונטערגעשריבן דורך אלע מנהלי הישיבות איבער די חומר הענין.
