פילע חסידי פשעווארסק פון איבער די גאנצע וועלט גרייטן זיך אפצורייזן צום רבינ'ס הויף אין אנטווערפן בעלגיע, צו אנטייל נעמען ביי די גרויסע שמחה בצל הקודש פון כ"ק אדמו"ר מפשעווארסק שליט"א וואס קומט פאר קומענדיגע וואך מיטוואך פרשת תצוה, ווען דער רבי שליט"א וועט אונטערפירן א חשובער אייניקל אונטער די חופה, וועם דער רבי האט ערצויגן ווי אן אייגן קינד ביי זיך אין שטוב.
די רעדע איז פון די איינציגע טאכטער ביים רבינ'ס טאכטער הרבנית בריעף ע"ה, וועלכער איז ליידער טראגיש אומגעקומען אין א קאר עקסידענט רח"ל מיט פופצן יאר צוריק. די כלה איז א טאכטער פון הרה"ג ר' נחמן כהנא שליט"א, זון פון כ"ק אדמו"ר מספינקא בני ברק שליט"א. די חתן איז א זון פון הרה"ג ר' יואל יאקאבאוויטש שליט"א ראש ישיבת קראלי.
וויבאלד די דאזיגע שמחה איז גאר פערזענליך ביים רבי'ן, ווי מען האט שוין געהערט אין מערערע געלעגנהייטן, ווערט די שמחת החתונה אפגעראכטן אויף פיל א גרעסערע פארנעם ווי די געווענליכע שמחות בחצר הקודש, און פאר דעם צוועק איז ארויסגעדינגען געווארן די גיגאנטישע פעסטונג "אנטווערפן עקספא צענטער" וואס געפונט זיך נישט ווייט פון די היימישע געגנט, און אין די פארגאנגענהייט האט דער רבי שוין חתונה געמאכט דארט עטליכע קינדער.
אויפן רבינ'ס איינלאדענונג קומען צו פארן הונדערטער חסידים פון איבער די וועלט, און חסידי פשעווארסק און כלל תושבי העיר אנטווערפן זענען איינגעשפאנט אויפצונעמען די פילע געסט וואס קומט פארוויילן אין שטאט דורכאויס די ימי השמחה. שבת קודש שבת שבע ברכות וועט געפראוועט ווערן אין די גרויסע בית רחל זאל, און וועט ווערן מיטגעהאלטן דורך פילע געסט און חסידים פון איבעראל.
