נעכטן זונטאג האט זיך אין א מזל'דיגע שעה אנגעהויבן די העפטיגע בוי ארבעט אויפצובויען א גרויסע נייע בית המדרש אין קרית וויזניץ קייאמישע לעיק, נאך וואס די עקזיסטירנדע בית המדרש אין שטעטל איז שוין היבש קליין צוצושטעלן איר געברויך, איבערהויפט ביי די גרעסערע ימים טובים ווען הונדערטער חסידים קומען זיך מסתופף זיין בצל הקודש פון כ"ק אדמו"ר מוויזניץ שליט"א פון קייאמישע.
לויט די פלענער וועט מען אויפבויען א ריזן היכל פון ארום צען טויזענט סקווער פיס, צווישן די שטעטל און די בנין הישיבה אויף בארנעס בולערוואד, און נעכטן זונטאג אינדערפרי האט מען אנגעהויבן אפשניידן די ביימער וואס געפונט זיך אויף יענעם באשטימטן שטח, צוצוגרייטן דעם באדן פאר די פאקטישע בוי ארבעט וואס וועט זיך בעז"ה אנהייבן אין די נאנטע וואכן.
נעכטן אויפדערנאכט איז כ"ק אדמו"ר מוויזניץ שליט"א פון קייאמישע געווען צוגאסט אין בארא פארק, צו באזוכן ביים שוויגער הרבנית הצדיקת מראחמיסטריווקא תליט"א לקראת יו"ט פסח, זייענדיג אין שטאט איז דער רבי ארויף אין שטוב פון איינער פון די חשובע גדולי התומכים והבונים, וועלכער האט דערביי מנדב געווען די ערשטע מיליאן דאללער פארן נייעם ביהמ"ד וואס וועט בעז"ה געבויעט ווערן לשם ולתפארת.
