א ימים נוראים'דיגער אטמאספער האט זיך אפגעשפילט די וואך בחצר הקודש בעלזא, ווען עס איז פארגעקומען די יערליכע מעמד "כוללות קוויטל" דורך די טויזענטער ילדי התשב"ר פון אלע תלמודי תורה דחסידי בעלזא איבער די וועלט, אלס השלמה צו די ימים הנוראים, נאך וואס יעדעס יאר גיבן די קינדער א כוללות קוויטל בעפאר די הייליגע טעג, און דאס יאר צוליב די מצב הבריאות ביי כ"ק אדמו"ר מבעלזא שליט"א איז דאס נישט צושטאנד געקומען.
די מעמד איז פארגעקומען דעם מאנטאג חיי שרה י"ט חשון, אין די גרויסע שטוב אין קרית בעלזא ירושלים, וואו עס האבן זיך צוזאמגענומען די טויזענטער קינדער פון אלע בעלזא חדרים אין ארץ ישראל, און די קינדער פון די בעלזא חדרים אין אויסלאנד האבן מיטגעהאלטן דורך א לעבעדיגע הוקאפ.
די קינדער האבן געזינגען ניגוני ימים נוראים, און געזאגט אינאיינעם פרקי תהלים לרפואתו פונעם מנהיג העדה כ"ק אדמו"ר מבעלזא שליט"א. דערנאך איז דער רבי אריינגעקומען און נאך קורצע גראמען האט מען צוגעברענגט פארן רבי'ן די כוללות קוויטל, דער רבי האט דורכגעליינט די נעמען און ווארעם געוואונטשן ברכות לרוב, דערנאך זענען די קינדער אריבער זיך וואונטשן ביים רבי'ן, וועלכער האט געשיקט פלעשלעך האניג צו פארטיילן פאר די קינדער.
