א ביטערע בשורה ווערט פארשפרייט אצינד אין די חסידישע וועלט, אז כ"ק אדמו"ר מצאנז זצ"ל פון בארא פארק איז נסתלק געווארן לגנזי מרומים אין עלטער פון 70 יאר, נאכן ליידן ביטערע יסורים די לעצטע פאר יאר ה"י.
דער צאנזער רבי הרה"צ רבי ברוך האלבערשטאם זצ"ל, איז געווען בנו בכורו פון כ"ק אדמו"ר מצאנז זצ"ל פון בארא פארק, וועלכער האט געצויגן זיין הערליכער יחוס בן אחר בן צו די הייליגע צדיקים לבית צאנז, א זון פון הרה"צ רבי ברוך האלבערשטאם זצ"ל אבד"ק גריבוב, א זון פון הרה"ק רבי מרדכי זאב מצאנז זצ"ל, זון פון הרה"ק רבי ארי' לייבוש מצאנז זצ"ל, א זון פון הרה"ק רבי אהרן מצאנז זצ"ל דער קרייזער רב, בנו ממלא מקומו פון הגה"ק בעל דברי חיים מצאנז זי"ע.
מצד אם אביו איז ער געווען אן אייניקל פון הרה"ק רבי סיני מזימיגראד זי"ע, ציענדיג נאכאמאל זיין שיינעם יחוס צום הייליגן צאנזער רב זי"ע, דער הייליגער ייטב לב פון סיגעט זי"ע, דער הייליגער ישמח משה זי"ע ולמעלה בקודש.
מיט דעם הייליגן יחוס איז דער רבי זצ"ל אויפגעוואקסן, און אלע יארן געשטאנען לימין הקודש פון זיין גרויסן פאטער דער רבי זצ"ל, וועלכער איז נסתלק געווארן מיט בלויז עטליכע יאר צוריק. בהגיעו לפירקו איז ער געווארן אן איידעם ביי הרה"צ רבי יחיאל מיכל ראטטענבערג זצ"ל מקאסאן קאזעווע, נין ונכד צו די הייליגע צדיקים לבית קאסאן און קאזעווע, און א איידעם ביי כ"ק אדמו"ר הרה"צ רבי משה רוקח זצ"ל מקאזלאוו, נין ונכד צו די הייליגע צדיקים לבית בעלזא און נאך.
דער רבי זצ"ל איז געווען באקאנט מיט זיין עבודה אין גמילות חסדים, זייענדיג דער עמוד החסד אינעם עיר ואם בישראל בארא פארק. לאנגע יארן האט ער אנגעפירט א ברייטע הכנסת אורחים אפאראט צו פלאצירן הונדערטער געסט מדי שבוע בשבוע, צו אין פריוואטע דירות אדער אין הכנסת אורחים שטיבער, ער האט זיי פארזארגט מיט אלעם גוטן, און בפי כל איז געווען באקאנט די ברייטהארציגע שטיצע פונעם צאנזער רבי'ן וועלכער איז גרייט צו העלפן יעדן איד באשר הוא שם.
מיטן הסתלקות פון זיין פאטער דער רבי זצ"ל י"ב תמוז תש"פ, איז דער רבי זצ"ל אלס בן הבכור געווארן אויפגענומען אלס ממלא מקום וממשיך השלשלת, דער רבי האט ווייטער אנגעפירט דעם שיינעם בית המדרש אויף די אכט און פערציגסטע סטריט ביי די זעכצנטע עוועניו, וואו פילע אידן האבן זיך דערווארעמט לאורו און נהנה געווען עצה ותושיה.
ליידער איז דער רבי באטראפן געווארן פון די ביטערע מחלה ה"י עטליכע יאר צוריק, און האט א לענגערע צייט זיך געמוטשעט מיט שרעקליכע יסורים ומכאובים, זייענדיג א יוצא ונכנס אין שפיטאל מיטן האפענונג אויף בעסערע צייטן. אין די לעצטע פאר טעג האט זיך די מצב דראסטיש פארערגערט, און היינט האט מען צוגעלייגט דעם נאמען "שמחה" אלס א סגולה לרפואה.
יעצט מאנטאג פארנאכטס האט דער רבי זצ"ל צוריקגעגעבן זיין ריינע אויסגעלייטערטע נשמה ליוצרה, אין עלטער פון זיבעציג יאר, איבערלאזנדיג פילע אידן צובראכן און פארטרויערט, זיין לעכטיגע משפחה וואס ער לאזט איבער, און טויזענטער אידן וואס האבן דורכאויס די יארן נהנה געווען פון זיין אפענע טיר און פעולות נשגבות.
דער רבי זצ"ל לאזט איבער פיר זיהן און דריי איידימער, די זיהן הגה"צ ר' חיים יואל האלבערשטאם שליט"א, איידעם ביי הגה"צ ר' שמחה בונם פישער שליט"א ממאטערסדארף, הגה"צ ר' יעקב האלבערשטאם שליט"א, איידעם ביי הגה"צ אבד"ק קשאנוב שליט"א, איידעם ביי כ"ק אדמו"ר מסטריזוב שליט"א, הגה"צ ר' משה שמואל האלבערשטאם שליט"א, איידעם ביי הגה"צ ר' לייבוש איליאוויטש שליט"א משאמשאן, און הגה"צ ר' סיני האלבערשטאם שליט"א איידעם ביי הגה"צ ר' נטע לאנדא שליט"א מח"ס נר יהושע. די איידימער זענען הגה"צ ר' משה זיינוויל ברוינשטיין שליט"א זון פון הרה"ג ר' אברהם יצחק ברוינשטיין שליט"א מרבני וויזניץ אין מאנסי, הגה"צ ר' אהרן ארי' לייבוש זינגער שליט"א, זון פון הגה"צ אבד"ק וראש ישיבת אלכסנדר שליט"א איידעם ביי כ"ק אדמו"ר מסטריזוב שליט"א, און הגה"צ ר' יוסף ישראל טייטלבוים שליט"א, זון פון הגה"צ ר' אלחנן חיים טייטלבוים שליט"א.
אויסער דעם לאזט דער רבי זצ"ל איבער זיינע חשובע געשוויסטער אדמורי"ם ורבנים, כ"ק אדמו"ר מצאנז קרעניץ שליט"א, כ"ק אדמו"ר מבני תורה צאנז שליט"א, כ"ק אדמו"ר מצאנז וומס"ב שליט"א, כ"ק אדמו"ר מצאנז סטראפקוב שליט"א, כ"ק אדמו"ר מצאנז מאנסי שליט"א, כ"ק אדמו"ר מצאנז סטעטן איילענד שליט"א, כ"ק אדמו"ר מצאנז קרית יואל שליט"א, און כ"ק אדמו"ר מצאנז גריבוב שליט"א. די שוואגערס זענען כ"ק אדמו"ר מאלכסנדר שליט"א, כ"ק אדמו"ר מקאלאמייא שליט"א, הגה"צ אבד"ק ווענגרוב שליט"א, הגה"צ אבד"ק דושינסקיא ב"פ שליט"א, הגה"צ אבד"ק גלאגוב שליט"א, און הגה"צ ראש ישיבת נייטרא שליט"א.
זכר צדיק לברכה לחיי העולם הבא.
