בחצר הקודש וויזניץ אין לאנדאן האט זיך אנגעהויבן היינט לעכטיגע ימי אורה וחגיגה, א גרויסארטיגע מסע הקודש וואס כ"ק אדמו"ר מוויזניץ שליט"א פון לאנדאן נעמט אונטער קיין פוילין, אינאיינעם מיט א געקליבענע צאל נגידים ותומכי המוסדות, וואס האבן זיך אנגערופן מיט גרויסע סכומים אוועקצושטעלן די בניני הישיבה הקדושה בית ישראל דחסידי וויזניץ אין לאנדאן, און די גרויסע מעמד חנוכת הבית און הכנסת ספר תורה פאר די נייע בנין הישיבה אין לאנדאן.
ווי באקאנט איז דער רבי שליט"א אריינגעשפרינגען מיט עטליכע יאר צוריק, אין א מאלטי מיליאן דאללערדיגע פראיעקט אינאיינעם מיט די הנהלת המוסדות, אפצוקויפן א גיגאנטישע געביידע אין ענפיעלד ענגלאנד, וואו צו סטאנציאנירן דעם רבינ'ס ישיבה גדולה "בית ישראל", וואו צענדליגע בחורים ווערן נתחנך בדרך התורה והחסידות, און גענוי ווי זיין פאטער דער רבי זצ"ל, האט דער רבי שליט"א געוואלט ארויספירן די ישיבה מחוץ לעיר צו קענען לערנען מיט הרחבת הדעת ווייט פון די שטאטישע גאסן.
אין די לעצטע דריי יאר איז דורכגעפירט געווארן א סעריע געלט אקציעס אויפצוטרייבן די נויטיגע פאנדן און אהערשטעלן דעם בנין פאר די תלמידי הישיבה, און פאר די תומכים פון צען טויזענט דאללער און העכער האט דער רבי געמאלדן אז ער וועט ארויספארן מיט זיי אויף א ספעציעלע נסיעה לאות הוקרה פאר זייער הילף אוועקצושטעלן די בנין הישיבה.
אצינד גרייט מען זיך אויף די געהויבענע מסע הקודש וואס קומט פאר די וואך פרשת ויקהל פקודי, ווען דער רבי שליט"א וועט ארויספארן צום שטאט ליזענסק אין פוילין, מקום מנוחת הקודש פונעם הייליגן רבי'ן ר' אלימלך זי"ע, און דארט פראווענען א גרויסע שבת אינאיינעם מיט ארום צוויי הונדערט נדיבי לב, סיי פון אייראפע און סיי פון אמעריקע.
די ימי החגיגה האט זיך אנגעהויבן היינט דאנערשטאג פרשת ויקהל פקודי, ווען עס ווערט געפייערט די חגיגת חנוכת הבית און קביעת מזוזה פון די נייע בנין הישיבה אין ענפיעלד, קאמבאנירט מיט די מעמד הכנסת ספר תורה וואס איז געשריבן געווארן דורכ'ן רבינ'ס בעל אכסניא אין מאנסי, הנגיד החסיד ר' יעקב יהושע פיש הי"ו, לע"נ אביו הרב החסיד ר' אלטר בנציון פיש ע"ה.
די סיום כתיבת האותיות קומט פאר בהיכל הישיבה אין ענפיעלד, אינאיינעם מיט די מעמד קביעת מזוזה ברוב עם. שפעטער נאכמיטאג וועט פארקומען די מעמד הכנסת ספר תורה אין די סטעמפארד הילל געגנט אין לאנדאן, די תהלוכה וועט ארויסגיין מביתו נאוה קודש פונעם רבי'ן, און די ספר תורה וועט ווערן אריינגעפירט צום גרויסן ביהמ"ד דחסידי וויזניץ אויף די קלעפטאן קאממאן גאס. עס וועט ווערן נאכגעפאלגט מיט די סעודה לגומרה של תורה אינאיינעם מיט די פייערליכע מעמד חנוכת הבית פאר די בנין הישיבה, אין די גרויסע זאלן פון יסודי התורה אין שטאט.
באלד נאכן מעמד באישון ליל וועט דער רבי שליט"א ארויספארן אינאיינעם מיט די נדיבי לב צו די סטענסעד לופטפעלד אין לאנדאן, וואו מען וועט זיך הייבן אין א מזל'דיגע שעה מיט א טשארטער פליגער קיין ריישא אין פוילין, און פון דארט וועט מען צופארן קיין עיר הקודש ליזענסק וואו עס וועט געפראוועט ווערן די געהויבענע שבת בצל הקודש.
דורכאויס שבת וואס קומט אויס שבת החודש, שבת בעפאר די הילולא קדישא פון הרה"ק בעל תורת מרדכי מוויזניץ זי"ע, וועט בנו חביבו דער רבי שליט"א אפרעכטן די תפילות און טישן אין די פראכטפולע גערטנער האטעל אין שטאט ליזענסק, מוצאי שבת כחצות הלילה נאך א מעמד הכנה און פראכטפולע סעודת מלוה מלכה וועט דער רבי שליט"א פוקד זיין דעם ציון הק' פונעם הייליגן רבי'ן ר' אלימלך זי"ע בהתעוררות רב.
נאך שבת וועט דער רבי שליט"א פוקד זיין נאך עטליכע מקומות הקדושים אין פוילין און אוקראינע, און דערנאך וועט דער רבי שליט"א ארויספארן אויפן וועג קיין ניו יארק, אויף א בליץ באזוך לקראת די הילולא קדישא פונעם פאטער הרה"ק בעל תורת מרדכי מוויזניץ זי"ע.
