שטייענדיג נאך בשנת האבילות להסתלקותו לשמי מרום פון כ"ק אדמו"ר בעל ישועת יעקב מסקולען זצ"ל, ווערט געמאלדן אז די צוויי קינדער פונעם רבי'ן כ"ק אדמו"ר מסקולען שליט"א, און כ"ק אדמו"ר מישועת יעקב סקולען שליט"א, וועלן אפרעכטן אינאיינעם די יערליכע סעודת הודאה מוצאי שבת נחמו, יום הצלה והשחרור פון זייערע גרויסע זיידעס די הייליגע צדיקים לבית סקולען זי"ע, אינעם עיר ואם בישראל בארא פארק.
ווי באקאנט פלעגט דער סקולענער רבי הרה"ק בעל ישועת יעקב זצ"ל אפרעכטן די סעודת הודאה יאר יערליך ברוב עם הדרת מלך, אינאיינעם מיט די ברידער כ"ק מרנן האדמורי"ם שליט"א לבית סקולען, אינעם עיר הצדק קרית יואל. אצינד אבער ווען בניו ממשיכי דרכו געפונען זיך נאך בשנת האבילות, איז באשלאסן געווארן צו פראווענען דעם סעודת הודאה בעיר מגורם אין בארא פארק, ווען צו דעם צוועק איז ארויסגעדינגען געווארן די בית אסתר זאל אויף די פופציגסטע סטריט ביי די פערצנטע עוועניו.
צוליב די שנת האבילות וועט נישט זיין קיין מוזיק ביים סעודת הודאה, אזוי ווי עס איז געווען אין יאר תשע"ט, בשנת האבילות נאכן הסתלקות פון כ"ק אדמו"ר הרה"ק בעל מאור ישראל מסקולען זצ"ל.
אזוי ווי פארגאנגענע יאר, וועלן זייערע פעטערס כ"ק האדמורי"ם מסקולען שליט"א פראווענען די סעודת הודאה באזונדער, כ"ק אדמו"ר מסקולען שליט"א פון וויליאמסבורג וועט פראווענען די סעודת הודאה ברוב עם הדרת מלך אין זאל עטרת פעסיל לאה אין קרית יטב לב אין בלומינגבורג, וואו עס איז ערווארטעט א גרויסע ציבור חסידי סקולען, תושבי העיר, און פילע אידן וואס האלטן זיך אויף אין די קאנטרי בערג.
כ"ק אדמו"ר מסקולען שליט"א פון מאנסי וועט דאס יאר צום ערשטן מאל פראווענען א גרויסע סעודת הודאה ברוב עם הדרת מלך אין א גרויסע זאל, עס איז ארויסגעדינגען געווארן די אור החיים זאל בבנין בנות ישראל וויזניץ אויף סקול טערעס, וואס וועט ווערן צוגערישט צו קענען אקאמאדירן דעם ריזן ציבור המשתתפים.
כ"ק אדמו"ר מסקולען שליט"א פון לעיקוואד וועט אפרעכטן די סעודת הודאה ברוב עם הדרת מלך, אין היכל ביהמ"ד דקהל נועם אליעזר סקולען אין לעיקוואד.
כ"ק אדמו"ר מסקולען שליט"א פון ירושלים וועט דאס יאר פראווענען דעם סעודת הודאה אויף א גאר גרויסע פארנעם אין די גיגאנטישע בנין פון בית וויזניץ אין קרית וויזניץ בני ברק, וואו עס איז ערווארטעט א ריזן ציבור צו מיטהאלטן דעם געהויבענעם מעמד אויפן סקולענער שטייגער, נאך וואס די לעצטע פאר יאר ווען די סעודת הודאה איז געפראוועט געווארן אין א גרויסע שאטער אין ירושלים, איז נישט געווען גענוג פלאץ פאר די טויזענטער חסידים וואס זענען געקומען מיטלעבן די געהויבענע שעות.
