בחצר הקודש ראחמיסטריווקא אין אוקענוויין גרייט מען זיך אויף זעלטן געהויבענע ימי השמחה, ווען כ"ק אדמו"ר מראחמיסטריווקא שליט"א פון אוקענוויין וועט אין א מזל'דיגע שעה חתונה מאכן א קינד, און דערביי וועט אין א מזל'דיגע שעה באנייעט ווערן די נייע גרויסע בית המדרש דחסידי ראחמיסטריווקא, וואס ווערט געבויעט לשם ולתפארת אין די לעצטע פאר יאר.
דער ראחמיסטריווקא רבי שליט"א האט זיך געצויגן צו די אוקענוויין געגנט אין לעיקוואד מיט צוויי יאר צוריק, נאך איידער די הסתלקות פון אביו הגדול כ"ק אדמו"ר הרה"ק מראחמיסטריווקא זי"ע, אין יענע תקופה איז פארגעקומען די מעמד הנחת אבן הפינה פאר די נייע בית המדרש, בביתו נאוה קודש פונעם רבי'ן זצ"ל וועלכער האט געלייגט די גרונדשטיין פאר דעם נייעם בית גדול לאלקים. אזוי אויך האט דער רבי זצ"ל נאך באזוכט אויף דעם שטח וואו עס ווערט געבויעט די נייע ביהמ"ד, זייענדיג צוגאסט אין שטאט לעיקוואד.
די בוי ארבעט איז אנגעגאנגען אין פולן שוואונג, און אט האלט מען שוין ביים מאמענט פון באנייען די שוהל, ווען עס ווערט דורכגעפירט די לעצטע אפטיילונגען פון די בוי ארבעט צו פארענדיגן דעם בנין כלול בהדרו, סיי פון אינעווייניג און סיי פונדרויסן.
פארגאנגענע וואך ווען כ"ק אדמו"ר מראחמיסטריווקא שליט"א איז געווען צוגאסט אין לעיקוואד, אין ראם פון א בליץ באזוך פון איין טאג קיין אמעריקע, האט דער רבי שליט"א באזוכט אין די נייע ראחמיסטריווקא שוהל אין אוקענוויין, אין באגלייטונג פון שאר בשרו דער ראחמיסטריווקא רבי פון אוקענוויין. דער רבי פון ארץ ישראל האט זיך אומגעקוקט אינעם נייעם ביהמ"ד און איבערגעגעבן ברכת קדשו צו פארענדיגן די בוי ארבעט מיט הצלחה.
מאנטאג פרשת כי תצא וועט בעז"ה געפראוועט ווערן די שמחת החתונה פון די כלה א טאכטער ביים רבי'ן שליט"א, מיט די חתן א דאפלטע אור אייניקל פון זיין פעטער כ"ק אדמו"ר מסקווירא שליט"א. די חתונה וועט געפראוועט ווערן אין ביהמ"ד הגדול אין שיכון סקווירא, און די שבת שבע ברכות וועט פארקומען אויף א גרויסע פארנעם אין אוקענוויין, ווען עס וועט צום ערשטן מאל באנייעט ווערן די נייע פראכטפולע בנין בית המדרש ברוב פאר והדר.
צו דעם פרייליכן שבת של שמחה און שבת חנוכת הבית וועלן אויך קומען צו פארן עטליכע ברידער האדמורי"ם שליט"א וואס וועלן פראווענען אינאיינעם דעם שבת, און מוצאי שבת וועט פארקומען די צענטראלע שמחת השבע ברכות אינעם נייעם בית המדרש מיט די באטייליגונג פון אלע ברידער כ"ק מרנן האדמורי"ם מראחמיסטריווקא שליט"א.
