אלפי חסידי וויזניץ איבער די וועלט האבן היינט אויפגענומען מיט איבערראשונג די פרייליכע בשורה מטעם בית כ"ק אדמו"ר מוויזניץ שליט"א, אז דער רבי שליט"א גרייט זיך אריינצוגעבן א מהודר'דיגע ספר תורה וואס ער האט געלאזט שרייבן פארגאנגענע יאר, און די חגיגת הכנסת ספר תורה איז באשטימט געווארן אויף קומענדיגן יו"ט שבועות הבעל"ט.
אין די טעג נאך יו"ט פסח האט דער רבי שליט"א איבערראשט זיינע חשובע קינדער הרבנים הגאונים, איבער זיין אונטערנעמונג צו שרייבן א אייגענע ספר תורה בהידור רב, דער רבי שליט"א האט אנגעהויבן דעם פראיעקט מיט גענוי א יאר צוריק, וויילענדיג אין לאס אנדזשעלעס לצרכי רפואה, און האט זיך אליינס פארבינדן מיטן סופר מומחה און אים באאויפטראגט מיט די עבודת הקודש צו שרייבן דעם ספר תורה בהידור לזכותו ולרפואתו.
אצינד האט דער רבי געמאלדן אז ער גרייט זיך אפצורעכטן די מעמד הכנסת ספר תורה ברוב פאר והדר, דעם קומענדיגן יו"ט שבועות הבעל"ט, בתוככי קרית מלך רב שיכון וויזניץ בני ברק, לויט די ערשטע פלענער וואס זענען פארעפנטליכט געווארן וועט די תהלוכת ספר תורה פארקומען ערב יו"ט א שעה פארן זמן הדלקת הנרות אויף די גאסן פון שיכון וויזניץ, און די שמחת התורה וועט זיך אריינציען אינעם יו"ט, צום הויכפונקט ביים טיש נעילת החג שבת פרשת נשא נאכמיטאג, ווען עס וועט געפייערט ווערן די סעודה לגומרה של תורה בתופים ובמחולות.
