דעם ענדע וואך פרשת תזריע טהרה וועט כ"ק אדמו"ר מוויזניץ שליט"א מופיע זיין בשערי ניו יארק אויף א באזוך פון צוויי וואכן, מחזק צו זיין קהל עדת צאן מרעיתו, און פראווענען צוויי ספעציעלע שבתים בקרב חסידיו, איין שבת מיט די צעירי הצאן, און איין שבת מיט די חברי חבורת לב וויזניץ.
דער רבי שליט"א וועט אנקומען קיין ניו יארק דעם דאנערשטאג אינדערפרי, און וויילן דאהי ביז מאנטאג פרשת אמור, דורכאויס די וואכן טעג וועט דער רבי זיך אויפהאלטן אויף א פארמאכטע פארנעם, און בלויז ערשיינען צו תפילת מעריב און ספירת העומר פארן ברייטן ציבור, קומענדיגן זונטאג פרשת אמור א נאכט בעפארן צוריק אהיימפארן קיין ארץ ישראל.
דעם שבת פרשת תזריע טהרה וועט דער רבי פראווענען אין די טאמס ריווער געגנט נעבן לעיקוואד, וואו עס וועלן מיטהאלטן אריבער הונדערט צעירי הצאן, די ילדי הת"ת פון כתה ו' ביז כתה ט', וואס וועלן האבן די געלעגנהייט להסב על שולחן המלך, גענוי ווי דער רבי האט מיט עטליכע חדשים צוריק געפראוועט א שבת ספעציעל פאר די צעירי הצאן אין ארץ ישראל.
די קומענדיגע וואך שבת פרשת אחרי קדושים, וועט דער רבי פראווענען אינאיינעם מיט די אינגעלייט און בעלי בתים, וואס זענען אנגעשלאסן אינעם רבינ'ס חבורה "לב וויזניץ".
