היינט מאנטאג אינדערפרי איז כ"ק אדמו"ר מראחמיסטריווקא שליט"א פון ספרינג וואלי נתבשר געווארן איבער די פטירה פון זיין שוועסטער מרת פיגא יענטא טווערסקי ע"ה אין ארץ ישראל, דער רבי האט מקבל געווען אבילות און זיך געזעצט שבעה בביתו נאוה קודש אין מאנסי. אצינד דאווענט דער רבי שליט"א תפילת שחרית בבית מדרשו אין מאנסי, און וועט דערנאך מקבל זיין תנחומין פון די חסידים.
די נפטרת מרת פיגא יענטא ע"ה איז געווען די עלטסטע טאכטער פון הרה"צ רבי מרדכי טווערסקי זצ"ל, בנו הגדול פון כ"ק אדמו"ר הרה"ק מראחמיסטריווקא זי"ע, און איידעם ביי זיין פעטער הרה"צ רבי וועלוויל טווערסקי זצ"ל, זון פון הרה"ק רבי יוחנן מראחמיסטריווקא זי"ע.
ליידער איז זי נישט געזונט געווען פון געבורט, און נאך א פארערגערונג אין די מצב די לעצטע פאר טעג, איז זי נפטר געווארן היינט מאנטאג, די לוויה קומט פאר בעיר הקודש ירושלים, און זי וועט קומען לקבורה אויפן הר הזיתים.
אויסער איר ברודער דער רבי שליט"א וועלכער זיצט שבעה, און וועט דורכאויס די טאג באשליסן אויב ער פארבלייבט אין ניו יארק פאר די ימי השבעה, אדער פארן קיין ארץ ישראל זיצן מיט די בני המשפחה, זיצן אויך שבעה די מאמע הרבנית תליט"א, די שוועסטער הרבנית מזוועהיל תליט"א, אשת חבר כ"ק אדמו"ר מזוועהיל שליט"א אין ארה"ק, און נאך עטליכע ברידער און שוועסטער בארץ הקודש.
