א היסטארישע מעמד איז פארגעקומען דעם מוצאי שבת קודש פרשת תצוה שבת זכור, ווען עס זענען זיך צונויפגעקומען כלל תלמידי וחסידי ערלוי פון איבער גאנץ ארץ ישראל צום גרויסן מעמד "תורתו אמת", אפצוצייכענען די הוצאה לאור פון די הייליגע ספרים און לעכטיגע ירושה פון כ"ק אדמו"ר גאב"ד ערלוי זצ"ל בעל אמרי סופר, ווען עס איז אין א מזל'דיגע שעה פארענדיגט געווארן די הוצאה לאור פונעם רבינ'ס ספרים, די עטליכע בענדער אמרי סופר און נאך עטליכע ספרי קודש.
די מעמד איז פארגעקומען אין די טעג ארום די ניינטע הילולא קדישא פונעם רבי'ן זצ"ל, וואס געפאלט היינטיגן דאנערשטאג תענית אסתר י"ג אדר, די ריזן פראכטולע די סיטי זאל אין מעלה אדומים נעבן ירושלים עיה"ק, איז אהערגעשטעלט געווארן מיט טויזענטער פלעצער פאר אלע חסידים, מיט א הערליכע בימת הכבוד אין צענטער פון זאל, וואו כ"ק אדמו"ר מערלוי שליט"א האט באשיינט בראש המסובים, אינאיינעם מיט זיינע חשובע ברידער הרבנים הגאונים שליט"א.
אלס נואם הכבוד האט אויפגעטרעטן הגה"צ רבי אהרן שיף שליט"א גאב"ד אנטווערפן, פון די גאר נאנטע תלמידים ביים ערלויער רבי'ן זצ"ל, אויך האט אויפגעטרעטן הגה"צ ר' שלום צבי סופר שליט"א בנו יחידו פון כ"ק אדמו"ר מערלוי שליט"א, און דער רבי שליט"א האט משמיע געווען ברכת הקודש לכל העם הנאספים.
אויפן טעכנישן פראנט האט די בארימטע פירמע "טיפ הפקות" ארגאנעזירט דעם גאנצן מעמד אויף א פראכטפולן פארנעם, און אויפן מוזיקאלישן פלאטפארמע האבן מהנה געווען די בעלי מנגנים פון די בארימטע מלכות קאפעליע.
