נעכטן זונטאג איז נפטר געווארן לחיי העולם הבא איינער פון די חשובע ראשי ישיבות בארץ הקודש, הגאון הגדול רבי זאב בערלין זצ"ל ראש ישיבת גאון יעקב, איידעם פונעם גאון מפורסם ראש הישיבה רבי אהרן לייב שטיינמאן זצ"ל.
דער גאון רבי זאב בערלין זצ"ל איז געווען דריי און אכציג יאר אלט, און האט נאך דעם שבת מיטגעהאלטן ווי געווענליך די תפילות בהיכל הישיבה, און עולה געווען די עליה פון מפטיר קריאת פרשת זכור. מוצאי שבת האט ער נאך געמאכט קידוש לבנה, עטליכע שעה שפעטער זונטאג פארטאגס איז ער פלוצלינג נפטר געווארן לחיי העולם הבא, נאך א שווערע מחלה וואס ער האט געליטן די לעצטע תקופה.
זיין טאטע הגאון ר' חיים בערלין זצ"ל איז געווען פון די נאנטע מקורבים ביים בריסקער רב זצ"ל, און ר' זאב זעלבסט האט געלערנט אין בריסק ביי הגאון הגדול רבי יאשע בער סאלאווייטשיק זצ"ל דער בריסקער רב, ביי וועם ער האט גענאסן א קירבה יתירה. אין יאר תשכ"ה האט ער חתונה געהאט מיט זיין חשובע רעבעצין ע"ה, א טאכטער פונעם ראש ישיבה הרב שטיינמאן זצ"ל. זיין רעבעצין איז נפטר געווארן פלוצלינג חודש כסלו תשע"ח, געציילטע וואכן בעפאר די הסתלקות פון איר גרויסן פאטער דער ראש ישיבה זצ"ל.
פאר א לעכטיגע תקופה פון נאנט צו פופציג יאר איז ער געשטאנען אין שפיץ פון די ישיבה "גאון יעקב" אין בני ברק, וואס ער האט מייסד געווען לשם ולתפארת. ער האט אויפגעשטעלט טויזענטער תלמידים בדרכי התורה והיראה, און משפיע געווען תורה והוראה אויף א גלאררייכע פארנעם. ער האט ארויסגעגעבן ספרים און חידושי תורה וואס זענען פארשפרייט איבער די וועלט, און ער האט זוכה געווען איבערצולאזן א שיינעם דור בליעה"ר.
די לוויה איז פארגעקומען זונטאג נאכמיטאג פון היכל ישיבת גאון יעקב אויף רחוב נחמי' אין בני ברק, און ער איז געקומען לקבורה אויפן פאנאוויטשער בית החיים, במעמד אלפי תלמידים ומעריצים וואס טוען באוויינען די שווערע פארלוסט.
