די טשערנאבילער קהילה אין אנטווערפן האט אין די יעצטיגע טעג זוכה געווען צו מרחיב זיין די גבולי הקדושה, ווען מען האט אין א מזל'דיגע שעה אפגעקויפט א נייער בנין אויף די איזאבעלעליי גאס אין אנטווערפן, וואו די ביהמ"ד וועט זיך בקרוב אריבערציען צום נייעם רחבות'דיגן לאקאל אין א מזל'דיגע שעה.
די טשערנאבילער בית המדרש איז שוין אקטיוו א שיינע פאר יאר, תחת דגלו והדרכתו פון כ"ק אדמו"ר מטשערנאביל שליט"א, וועלכער איז שוין עטליכע מאל געווען צוגאסט אין אנטווערפן און געדאווענט אין דעם בית המדרש. אין די לעצטערע חדשים מיטן בליה און וואוקס פון די ציבור חסידים האט די הנהלת הביהמ"ד אונטערגענומען דעם פראיעקט, און אריין אין קאנטראקט אויף א נייער געביידע, און דעם ערב שבת קודש פרשת אמור פסח שני איז די מקח געשלאסן געווארן בכי טוב אין א מזל'דיגע שעה, מיטן האפענונג אז אין די נאנטע צוקונפט וועט מען שוין באנייען דעם בנין לתורה ולתפילה.
