א שרעקליכע טרויער זעהט זיך אן אין די ביאלא הויף בעיר הקודש ירושלים, ווען מ'געפונט זיך אצינד אין די ימי השבעה צו די הסתלקות לשמי מרום פון כ"ק אדמו"ר מביאלא זצ"ל, מזקני צדיקי הדור, און געטרייער מנהיג פאר קהל עדת חסידיו רבות בשנים.
הונדערטער חסידים האבן זיך געזעצט אויף די ערד פארלאפענעם ערב שבת נאכמיטאג נאך די לוויה, צו טרויערן אויף דעם אבידת רבו וואס האט יעדן אויפגעשאקלט גאר טיף, די חסידים זענען געזעצן אין ביהמ"ד און זיך שווער געטרייסט, אינאיינעם מיט די חשובע קינדער הרבנים שליט"א קינדער פונעם רבי'ן זצ"ל, וועלכע זיצן שבעה די טעג אין ביהמ"ד ביז דאנערשטאג אינדערפרי.
דעם שבת האבן הונדערטער חסידים מיטגעהאלטן די תפילות אין ביהמ"ד הגדול, אן דעם וואס מען זאל האבן אן איש על העדה, וואס ווי באריכטעט וועט מען אויסרופן איבער א ממלא מקום הערשט נאך די ימי השבעה. אויפן רבינ'ס פלאץ איז געשטאנען אויסגעלייגט די איבער הונדערט ספרים פונעם רבי'ן, די צענדליגע בענדער "מבשר טוב" אויף פילע חלקי התורה.
די קומענדיגע פיר טעג וועלן די קינדער פון רבי'ן זיצן שבעה יעדן טאג, פארמיטאג פון האלב נאך צען ביז האלב נאך איינס, און נאכמיטאג פון פינף אזייגער ביז צען אזייגער אויפדערנאכט. ביי די תפילות וועלן זיין פינף מנינים פאר יעדן איינעם פון די רבי'ס קינדער, אנגעהויבן פון די ערשטע מנין שחרית ביים נץ החמה.
