יעצט פארמיטאג ביים גרויסן מעמד קיום בית צדיקים אין ביהמ"ד הגדול ביאלא אין ירושלים, ככלות השבעה צו די הסתלקות פונעם רבי'ן זצ"ל, האט בנו בכורו פון רבי'ן הגה"צ ר' חיים יודא לייבוש ראבינאוויטש שליט"א אב"ד שערי תורה מאנטשעסטער, פארגעליינט די צוואה פונעם רבי'ן זצ"ל, וואו דער רבי איז מכתיר זיין פערטן זון כ"ק הרה"צ רבי יצחק יוסף דוב שליט"א אלס ממשיך השלשלת און ממלא מקום.
דער נייער רבי שליט"א איז דער פערטער זון פונעם רבי'ן זצ"ל, נאך בנו בכורו הגה"צ ר' חיים יודא לייבוש ראבינאוויטש שליט"א אב"ד שערי תורה מאנטשעסטער, הגה"צ ר' דוד מאניש ראבינאוויטש שליט"א, און הגה"צ ר' צבי ראבינאוויטש שליט"א. און יונגער פון רבי'ן איז דא נאך איין זון הגה"צ ר' אברהם משה ראבינאוויטש שליט"א רב חסידי ביאלא אין מעלה עמוס.
דער רבי שליט"א איז געבוירן י"ד טבת תשכ"ה אין געיטסהעד, אלס בחור האט ער געלערנט אין די פאנאוויטשע ישיבה אין בני ברק, ובהגיעו לפירקו איז ער געווארן אן איידעם ביי כ"ק אדמו"ר מקאפיטשניץ שליט"א. נאך די חתונה האט דער רבי אוועקגעשטעלט זיין שיינעם שטוב אין ירושלים עיר הקודש, א שטיק צייט שפעטער האט ער געוואוינט אין לוגאנא, ארויסצוהעלפן אין שטוב פון זיינע עלטערן, און דורכאויס די יארן האט ער געדינט אלס מרביץ תורה אין פארשידענע פלעצער, זייענדיג באקאנט מיט זיין געוואלדיגע השפעה פאר בחורים און אינגעלייט.
דער רבי שליט"א שטייט אין שפיץ פון די ישיבות הקדושות דחסידי ביאלא בארץ הקודש, נאך וואס זיין גרויסן פאטער דער רבי זצ"ל האט אים ממנה געווען אלס ראש הישיבה. אויך איז דער רבי א מחותן מיט חשובע אדמורי"ם ורבנים, צווישן זיי האדמורי"ם מבוהוש, סערט ויזניץ, שבט הלוי, אלכסנדר, קוזמיר, און אונגוואר.
דער רבי זצ"ל האט געשריבן אין די צוואה, אז טראץ וואס אלע קינדער זענען חשובע תלמידי חכמים, שפירט ער אז זיין פערטער זון דער רבי שליט"א איז דאס מערסטע פאסיג צו פירן די עדה חסידים, וויבאלד מען דארף האבן דערצו די ריכטיגע כוחות און וויכטיגע ענינים, און קענען טראגן די משא העם מיט אחריות.
