א ציבור עצום פון הונדערטער אייניקלעך און אור אייניקלעך, אין צוגאב צו פילע ידידים ומכירים און בני המשפחה, האבן היינט זונטאג פארמיטאג באגלייט למנוחת עולמים, הרבנית הצדיקת הישישה מרת אלטא חי' שרה יהודית אשכנזי ע"ה, אלמנת כ"ק הרה"צ רבי אלימלך אשכנזי זצ"ל גאב"ד מעלבארן סיגעיט, וועלכער איז דעם שבת נפטר געווארן בשיבה טובה, אין זעלטן טיפן עלטער פון הונדערט און דריי יאר.
די רעבעצין ע"ה איז געווען א טאכטער פון הרב החסיד ר' יקותיאל זלמן יו"ט ליפא וועבער ז"ל, א איידעם פון הרה"ק ר' איציקל מאלעסק וועליטשקא זי"ע, זי האט חתונה געהאט מיט איר ערשטע קאזין כ"ק הרה"צ רבי אלימלך אשכנזי זצ"ל, א זון פון איר פעטער הרה"צ ר' אלכסנדר חיים אשכנזי זצ"ל, און אינאיינעם האבן זיי אויפגעשטעלט א הערליכע דור ישרים יבורך.
דורכאויס די יארן האבן זיי געוואוינט אין בראזיל, וואו דער רב זצ"ל האט משמש געווען אלס רב אין התאחדות קהילות החרדים אין סאן פאולא, שפעטער האבן זיי געוואוינט אין מעלבארן אסטראליע, וואו דער רב זצ"ל האט משמש געווען אלס רב אין די חרדישע קהילה קהל עדת ישראל, און אויף די עלטערע יארן האבן זיי זיך געצויגן קיין סיגעיט, וואו דער רב זצ"ל האט משמש געווען ברבנות בבית מדרשו קהל חוות דעת.
נאכן הסתלקות פונעם מעלבארנער רב זצ"ל מיט דרייצן יאר צוריק, איז די רעבעצין אריבער וואוינען קיין בארא פארק, אין שטוב פונעם איידעם הגה"צ אבד"ק טארטיקוב שליט"א, און דעם שבת איז זי נפטר געווארן בשיבה טובה, אין טיפן עלטער פון הונדערט און דריי יאר. די לוויה איז פארגעקומען היינט פארמיטאג ביים טארטיקובער בית המדרש אין בארא פארק, און מארגן מאנטאג וועט פארקומען די לוויה אינעם בית הלוויות שמגר אין ירושלים, אויפן וועג צום הר הזיתים.
די רעבעצין האט זוכה געווען איבערלאזן א הערליכע דור, גאר חשובע קינדער אדמורי"ם רבנים, ראשי ישיבות ומרביצי תורה, אויך אין די קומענדיגע דור פון די אייניקלעך האט זי זוכה געווען צו זעהן ממשיכי שלשלת הקודש, אדמורי"ם ורבנים, און גאר חשובע מרביצי תורה וראשי ישיבות, מנהיגי קהילות קדושות בישראל.
צוויי יאר צוריק איז נפטר געווארן איר עלטסטן זון כ"ק אדמו"ר מאלעסק זצ"ל, צוועלף יאר פריער איז נפטר געווארן א אנדערע זון הגה"צ ר' יואל זלמן אשכנזי זצ"ל מייסד קופת הצדקה משמחי לב, און עטליכע יאר פריער האט די רעבעצין ע"ה באגלייט א טאכטער למנוחות, מרת מלכה קרעמער ע"ה.
אויסער דעם האט זי איבערגעלאזט נאך א רייע קינדער אדמורי"ם ורבנים, כ"ק אדמו"ר מהורדענקא שליט"א פון פלעטבוש, הגה"צ ר' אשר אנשיל אשכנזי שליט"א גאב"ד חוות דעת סיגעיט, הגה"צ ר' שלום אהרן אשכנזי שליט"א ראש ישיבת נדבורנא, הגה"צ ר' יהושע אשכנזי שליט"א ראש כולל רב אחא אין ירושלים, און צוויי טעכטער, הרבנית אשת הגה"צ ר' מאיר אברהם איליאוויטש שליט"א גאב"ד ס. פאולא בראזיל, און הרבנית אשת הגה"צ אבד"ק טארטיקוב שליט"א.
