הנהלת קהל ויואל משה ד'סאטמאר אין מאנסי האט אין די יעצטיגע טעג אויפגענומען א נייער דיין לשרת בקודש אלס דיין ומורה צדק פאר די בליענדע קהילה "ביהמ"ד יטב לב" ד'סאטמאר שכונת 306, די בית המדרש וואס איז דערווייל סטאנציאנירט אינעם בנין פון ביהמ"ד גרויסווארדיין ביים ווינקל פון רוט 306 און ריטא עוועניו, און איז אין די לעצטערע וואכן אריין אין קאנטראקט אפצוקויפן א אייגענע בנין ביים ווינקל פון רוט 306 און קרעסטוויו.

דער נייער דיין הרה"ג ר' יצחק אברהם יונגרייז שליט"א, האט ביז היינט משמש געווען אלס דיין ומורה צדק אין די טאהשער קהילה אין מאנסי, ער איז א זון פון הרה"ג ר' יהושע צבי יונגרייז שליט"א אבד"ק טאלטשאווא, און א איידעם ביי הרה"ג ר' נפתלי וואגשאהל שליט"א מפארי חסידי סאטמאר אין מאנסי. דער דיין שליט"א דינט שוין פאר לאנגע יארן אלס מו"ץ אין די בית הוראה פון די סאטמארע קהילה, און איז אצינד נתמנה געווארן צו דינען אלס מנהיג רוחני פון די סאטמארע קהילה אויף 306, מיטן שטענדיגן בליה און וואוקס בליעה"ר.

פארלאפענע וואך איז פארגעקומען א מסיבת לחיים לכבוד די התמנות במעון הקודש פון כ"ק אדמו"ר מסאטמאר שליט"א נשיא הקהילה, און דערנאך א באזונדערע מסיבת לחיים במעון הקודש פון כ"ק אדמו"ר מבית חיים יהושע שליט"א, וואו בנו הגה"צ גאב"ד סאטמאר מאנסי שליט"א האט געוויילט דורכאויס די זוממער וואכן.