אין ליכט פון א שרעקליכע געשעעניש וואס האט פאסירט דעם יום טוב חנוכה בחצר הקודש ביטשקוב, ווען א ספר תורה איז געפאלן צו די ערד ה"י, איז באשטימט געווארן דורך כ"ק אדמו"ר מביטשקוב שליט"א אויף מארגן מאנטאג, אלס א יום תפלה ותענית בהתעוררות רב, וואו אלע חסידים וועלן אויסנוצן דעם ערשטן האלבן טאג אלס א תענית און עצרת תפילה.
די שרעקליכע פאסירונג האט פאסירט זאת חנוכה אינדערפרי, ווען כ"ק אדמו"ר מביטשקוב שליט"א האט ארויסגענומען די ספר תורה פון ארון הקודש, און עס איז געפאלן אויף די טרעפ פון די ארון הקודש רח"ל, ביים טיש שפעטער נאכמיטאג האט דער רבי געזאגט אז ער האט אנגעפרעגט דעת תורה ביי הגאון הגדול רבי שמואל אליעזר שטערן שליט"א גאב"ד מערב ב"ב, וועלכער האט געהייסן על פי פסקי הלכה פון הגה"ק בעל שבט הלוי זי"ע, אז מען זאל פאסטן א האלבע טאג, געבן צדקה און מאכן א יום תשובה.
דעריבער האט דער רבי באשטימט אויף מארגן מאנטאג אלס א יום תפילה ותענית, וואו אלע חסידים וועלן זיך צוזאמקומען אין ביטשקובער בית המדרש אין יפו, נאך תפילת שחרית וועט דער רבי אויפטרעטן מיט דברי התעוררות, און דערנאך וועט מען זאגן פרקי תהלים און די דרייצן אני מאמינ'ס, און בחצות היום אויספאסטן פון די תענית.
