מטעם קהל נצח ישראל סקולען אין וויליאמסבורג איז געמאלדן געווארן אז היינט אויפדערנאכט וועט פארקומען א גרויסע מעמד הכתרה און קבלת פנים, לכבודו פון כ"ק אדמו"ר מסקולען שליט"א פון לינדען, וועלכער ווערט אויפגענומען לשרת בקודש למלא מקום אבותיו הקדושים אין די סקולענער בית המדרש אויף קיעפ סטריט אין וויליאמסבורג.
דער רבי שליט"א וועלכער איז דער צווייטער זון פון כ"ק אדמו"ר הרה"ק מסקולען זצ"ל, און א איידעם ביי כ"ק אדמו"ר מטשערנאביל שליט"א, האט אנגענומען די כתר האדמורו"ת אין לינדען מיט עטליכע חדשים צוריק, נאכן הסתלקות פון אביו הגדול דער רבי זצ"ל. אצינד איז דער רבי נעתר געווארן לבקשת חסידי סקולען אין וויליאמסבורג וועלכע האבן פארבעטן דעם רבי'ן צו קומען פראווענען און אנפירן די אלטע סקולענע בית המדרש אויף קיעפ סטריט אין וויליאמסבורג, באותו מקום וואו זיין טאטע, זיידע, און עלטער זיידע האבן משמש געווען באדמורו"ת, און משפיע געווען פאר אידישע קינדער עבודת השם און חסידות.
