א ביטערע טראגעדיע האט פאסירט נעכטן נאכט אין בארא פארק, ווען א עלטערער איד פון וויליאמסבורג איז ליידער נפטר געווארן, אריבערשפרייזנדיג די גאס אויף די אכצנטע עוועניו צווישן די אכט און פערציגסטע און ניין און פערציגסטע סטריט.
הרב החסיד ר' נח קליין ע"ה איז געווען צוויי און אכציג יאר אלט, מחשובי חסידי סאטמאר וועלכער האט געלערנט אין די סאטמארע ישיבה אלס בחור, אויך האט ער געהאט די זכיה צו זיין דער הויז בחור ביי הרה"ק מסאטמאר זי"ע, און האט אסאך געטון צו ראטעווען צובראכענע אידן פון נאנט און ווייט. צענדליגע יארן האט ער געפירט זיין געשעפטל אין בארא פארק, פארקויפנדיג טייערע זילבער שטיק, אנגעהויבן ביי די דרייצנטע עוועניו, און שפעטער ביי די אכצנטע עוועניו.
נעכטן נאכט איז ער געווארן אראפגעקלאפט דורך א קאר פארנט פון זיין געשעפט, און א קורצע צייט דערויף איז ליידער באשטעטיגט געווארן אז ער איז נפטר געווארן לחיי העולם הבא, ווען דער קאר דרייווער ווערט באשולדיגט אין דרייוון מיט סוספענדעד לייסענס.
די לוויה וועט פארקומען היינט 1:30 נאכמיטאג, פארנט פון ביהמ"ד הגדול דקהל יטב לב ד'סאטמאר אויף ראדני סטריט אין וויליאמסבורג.
