א הערליכע מעמד כבוד התורה איז פארגעקומען אין ביהמ"ד הגדול דחסידי גור אין ירושלים, אין שפיץ פון כ"ק אדמו"ר מגור שליט"א, וואו עס איז ארויסגעהויבן געווארן די כבוד התורה פאר ארום טויזענט בחורי הישיבות והמתיבתות דחסידי גור, וואס זענען אנגעשלאסן אין די סדר הלימוד "חדוותא" אינערהאלב חבורת מזומנים, וואס האבן אצינד מסיים געווען גאנץ מסכת ראש השנה בידיעה ברורה.
די מעמד איז געווען געווידמעט לעילוי נשמת האשה החשובה מרת ליבא ווערדיגער ע"ה, מוטער פון להבחל"ח הנגיד המפורסם ר' שלמה ווערדיגער הי"ו בריח התיכון פון איחוד מוסדות גור, שטייענדיג בשנת האבל לפטירתה, דורכאויס די מעמד האט הנגיד ר' שלמה אויפגעטרעטן מיט א רירנדע דרשה און זיך אויסגעדרוקט אז נאך א יובל יארן האט ער זוכה געווען צו מקיים זיין די הבטחה פארן גערער רבי דער הייליגער בית ישראל זי"ע.
די מעמד איז פארגעקומען מיט דריי וואכן צוריק, ביים ענדע פון די יומא דהילולא קדישא פונעם הייליגן בית ישראל זי"ע ב' אדר, געווידמעט פאר די בחורים וואס זענען אנגעשלאסן אין סדר הלימוד "חדוותא", מיסודו פונעם ראש ישיבה הגה"צ ר' נחמיה אלתר שליט"א זון פון כ"ק אדמו"ר מגור שליט"א, וועלכער שטייט אין שפיץ פון די ספעציעלע פראגראם וואס געבט די געלעגנהייט פאר יעדן איינציגן בחור צו האבן א חלק אין ידיעת התורה, צו שטייגן העכער און העכער בעולם התורה, און זיין א פראמינענטע טייל פון די מאסיווע מהפכה פון ידיעת התורה אין גור.
דער מנכ"ל פון איחוד מוסדות גור הרב יונתן בורנשטיין שליט"א האט געדינט אלס יושב ראש, און אדרעסירט די געוואלדיגע כבוד התורה וואס מען זעהט דא ביי דעם מעמד, און ארויסגעהויבן לשבח די ווייטגרייכנדע פעולות נשגבות פונעם נגיד ר' שלמה ווערדיגער הי"ו. דערנאך האבן די בחורים פאר עטליכע מינוט איבערגעחזר'ט אויפן פלאץ די בלעטער גמרא, און ארויסגעוויזן זייערע געוואלדיגע ידיעות.
אין זיין דרשה האט הנגיד המפורסם ר' שלמה ווערדיגער ארויסגעברענגט די געוואלדיגע כבוד התורה וואס ווערט געשאפן פון דעם סדר הלימוד, און די געוואלדיגע מסירת נפש וואס הרב החסיד ר' יונתן בורנשטיין שליט"א מנכ"ל האיחוד לייגט אריין צו פארזיכערן די הצלחה פון יעדן תלמיד.
דעם רבינ'ס זון הגה"צ ר' נחמיה אלתר שליט"א האט אויפגעטרעטן מיט א דרשה און געוואונטשן הצלחה פאר די חשובע לומדים צו קענען ממשיך זיין בהתמדת התורה, צום שלוס האט גערעדט הגה"צ ר' הערשל ראטטענבערג שליט"א רב חסידי גור אין אמעריקע, איבער די געוואלדיגע חשיבות פון לימוד התורה.
די מעמד איז באשיינט געווארן מיט די פערזענליכע באטייליגונג פון כ"ק אדמו"ר מגור שליט"א, וועלכער האט אויסגעדרוקט גרויס קורת רוח פון די געוואלדיגע כבוד התורה, צום שלוס זענען די תלמידי הישיבות מיט זייערע מחנכים ארויס אין לעבעדיגע טענץ לכבודה של תורה ולומדיה.
