כ"ק אדמו"ר מוויזניץ שליט"א פון בית שמש איז היינט פארטאגס אנגעקומען צוגאסט קיין ניו יארק, צו באשיינען די שמחת הבר מצוה פון א אייניקל וואס קומט פאר קומענדיגע וואך, א זון פון זיין איידעם הגה"צ ר' חיים מאיר האגער שליט"א אב"ד וויזניץ בלומינגראוו, בנו יחידו פון אחיו הגדול כ"ק אדמו"ר מוויזניץ שליט"א פון וויליאמסבורג.
דער רבי וועט וויילן די קומענדיגע צוויי טעג אין קרית וויזניץ קייאמישע, בבית האכסניא ביי הנגיד החסיד ר' יודא יואל ראזענפעלד הי"ו. היינט אויפדערנאכט קומט פאר א ערשטמאליגע דינער אין קייאמישע לטובת די וויזניצע מוסדות אין בית שמש, אין שפיץ פון די ברידער כ"ק האדמורי"ם שליט"א, אזוי אויך וועט דער רבי ארומפארן אין די ארומיגע קאנטריס צו שאפן גרעסערע סכומים למען החזקת מוסדותיו הקדושים על טהרת הקודש.
דעם שבת קודש פרשת מטות מסעי וועט דער רבי שליט"א זיין צוגאסט אין בלומינגראוו קרית יואל, בבית חתנו הגה"צ ר' חיים מאיר האגער שליט"א. די תפילות און טישן וועט דער רבי שליט"א אפרעכטן בהיכל ישיבה גדולה תורת מרדכי וויזניץ, וואס שטייט בנשיאות אחיו הגדול דער וויזניצער רבי פון וויליאמסבורג.
קומענדיגן דינסטאג וועט פארקומען די שמחת הבר מצוה פון א אייניקל ביים רבי'ן, א זון פון זיין איידעם הגה"צ ר' חיים מאיר האגער שליט"א, די מעמד הנחת תפילין און מסיבת לחיים וועט פארקומען אין די היכל הישיבה אין בלומינגראוו, אין שפיץ פון די זיידעס כ"ק האדמורי"ם מוויזניץ שליט"א פון וויליאמסבורג און בית שמש, און שפעטער פארנאכטס וועט פארקומען די סעודת מצוה אין די נייע גרויסע ביהמ"ד אין מחנה אהבת ישראל וויזניץ אין ליבערטי.
מיטוואך וועט דער רבי פארזעצן די נסיעה קיין ענגלאנד, וואו דער רבי וועט וויילן אויף אפרוה אין שטעטל חלדודנא פאר צוויי וואכן, אינאיינעם מיטן שווער כ"ק אדמו"ר מוויזניץ שליט"א וועלכער האלט זיך דארט אויף אין לויף פון די זוממער וואכן.
