היינט פארטאגס האט כ"ק אדמו"ר מוויזניץ שליט"א פון בית שמש געלאנדעט אין ניו יארק, קומענדיג מעבר לים צו מנחם אבל זיין ביי אחיו הגדול כ"ק אדמו"ר מוויזניץ שליט"א פון מאנסי, היושב בעמק הבכא על פטירת הרבנית ע"ה. דער רבי שליט"א וועט פארבלייבן אין ניו יארק פאר עטליכע טעג, און דערנאך פארזעצן די נסיעה קיין מאנטריאל קאנאדע, צו באשיינען די שמחת החתונה בבית אחיו הגדול כ"ק אדמו"ר מוויזניץ שליט"א פון מאנטריאל בנישואי בתו, און אחיו הגדול כ"ק אדמו"ר מוויזניץ שליט"א פון קייאמישע בנישואי נכדו.
כ"ק אדמו"ר מוויזניץ שליט"א פון לאנדאן וועט מארגן מאנטאג ארויספארן אויף א בליץ נסיעה קיין ניו יארק אויף ניחום אבלים, מאנטאג נאכט וועט דער רבי באשיינען די שמחת החתונה במעון הקודש פונעם שווער כ"ק אדמו"ר מקאלוב שליט"א, בשמחת בית סאטמאר – קאלוב וואס קומט פאר אין בארא פארק, אויך וועט דער רבי באשיינען די שמחת החתונה פון א אייניקל ביים שוואגער כ"ק אדמו"ר מביקסאד שליט"א וואס קומט פאר אין מאנסי.
דינסטאג נאכמיטאג וועט דער וויזניצער רבי שליט"א פון לאנדאן באשיינען די שמחת פדיון הבן פון א אור אייניקל, אור אייניקל ביי אחיו הגדול כ"ק אדמו"ר מוויזניץ שליט"א פון מאנסי, וואס קומט פאר אין וויזניצע בית המדרש אין מאנסי, נאך וואס דער וויזניצער רבי פון מאנסי וועט אויפשטיין פון די שבעה.
שפעטער דינסטאג ביינאכט וועט דער רבי ארויספארן אויפן וועג קיין אנטווערפן בעלגיע, וואו דער רבי וועט פראווענען דעם קומענדיגן שבת פרשת שמות בקרב עדת צאן מרעיתו, ווי שוין געפלאנט א לענגערע צייט.
אויך כ"ק אדמו"ר מוויזניץ שליט"א פון מאנטריאל, איז פארלאפענעם דאנערשטאג אנגעקומען אויף א בליץ באזוך קיין ניו יארק צו מנחם אבל זיין ביים עלטערן ברודער כ"ק אדמו"ר מוויזניץ שליט"א פון מאנסי. דער רבי האט זיך באלד צוריקגעקערט קיין מאנטריאל, אין בעפארברייטונג צו די ימי השמחה במעון קדשו.
