אין אן ערשטמאליגן שריט איז געמאלדן געווארן בחצר הקודש באבוב, אז כ"ק אדמו"ר מבאבוב שליט"א וועט דעם שבת אפרעכטן אן ערשטמאליגע שבת סעודה אויף א פארמאכטע פארנעם, ספעציעל געאייגנט פאר די בחורי החסידות פון ישיבה גדולה, דעם קומענדיגן פרייטאג צונאכטס, שבת קודש ראש חודש אייר.
לויטן מעלדונג וועט דער רבי, אנדערש ווי געווענליך, אריינקומען צום טיש באלד נאכן דאווענען אין די נייע היכל הטישן (היכל ה'סוכה). דער רבי וועט דערביי מעריך זיין שולחנו הטהור, ביי וואס די בחורים וועלן מיטהאלטן מרישא ועד גמירא, און האבן די זכיה להסב על שולחן המלך און נהנה זיין מזיו הודו אויף א פערזענליכע פארנעם.
שפעטער נאכן טיש וועט זיין א געלעגנהייט פארן גאנצן ציבור מיטצוהאלטן די 'פירות טיש', וואס וועט אפגעראכטן ווערן אינעם ביהמ"ד הגדול אויף א גרעסערן פארנעם.
ווי דערמאנט וועט די שבת סעודה מיטן רבי'ן זיין געווידמעט פאר די בחורים פון ישיבות גדולות, וואס רעכנט אריין די מתיבתא עץ חיים ד'באבוב, ישיבת קדושת ציון, און אויך בחורים וואס לערנען אין כולל וכדו'. און ווי פארשטענדליך וועלן הונדערטער בחורים פון אלע שטעט קומען מיטהאלטן דעם ערשטמאליגן שבת סעודה בצל הקודש, און די עסקני הקהילה שטעלן צו אש"ל מלא פאר אלע בחורים געסט.
