אין די צייט וואס כלל ישראל איז איינגעהילט אין טרויער נאך די שרעקליכע עקסידענט וואס האט פאסירט נעכטן אין שטאט קעשינאוו אין מאלדאווע, וואס האט ליידער געקאסט דאס לעבן פון א חשובער אינגערמאן הרה"ח ר' עקיבא ראנד ע"ה פון ירושלים, איז כ"ק אדמו"ר מטשערנאביל שליט"א ארויסגעקומען מיט א הייסע רוף צום ציבור אז מען זאל מתפלל זיין אז די ארטיגע אויטאריטעטן זאלן וואס שנעלער באפרייען דעם גוף לקבורה.
ווי נעכטן באריכטעט האט די עקסידענט פאסירט אין מאלדאווע, ווען א גרופע אינגעלייט זענען געווען אונטערוועגנס צום ציון הק' פון הרה"ק רבי יחיאל מקרילאוויץ זי"ע אינאיינעם מיט פילע חסידים, וועלכע האבן זיך געגרייט צו פוקד זיין דעם ציון הק' אינאיינעם מיט כ"ק אדמו"ר מטשערנאביל שליט"א.
דער אינגערמאן ר' עקיבא ראנד ע"ה מחשובי חסידי טשערנאביל אין ירושלים, איז ליידער טראגיש אומגעקומען אין די שרעקליכע עקסידענט, און טראץ די אומגעהויערע שתדלנות דורך מערערע עסקנים סיי פון מאלדאווע און סיי פון ארץ ישראל, איז די גוף נאכנישט באפרייט געווארן לקבורה.
אצינד האט דער טשערנאבילער רבי שליט"א געהייסן איבערצוגעבן פאר אלע חסידים איבער די וועלט אז מען זאל מתפלל זיין פארן נפטר ר' עקיבא בן להבחל"ח ר' מרדכי דוד הי"ו, ער זאל וואס שנעלער קענען געברענגט ווערן למנוחה נכונה אן קיין שטער.
