כ"ק אדמו"ר מוויזניץ שליט"א פון ירושלים גרייט זיך אונטערצונעמען א נסיעה קיין לאנדאן הבירה, אויף ביקור חולים ביים ברודער כ"ק אדמו"ר מוויזניץ שליט"א פון לאנדאן, און לרגל די שמחת הקידושא רבא פון א בשותפות'דיגע אייניקל ביי ביידע ברידער האדמורי"ם.
נעכטן מאנטאג איז געבוירן געווארן א אור אייניקל ביי די ברידער האדמורי"ם, בת הנולדה ביי הרב ישראל אברהם שטיין שליט"א, זון פון הגה"צ ר' אלעזר שטיין שליט"א, איידעם ביי כ"ק אדמו"ר מוויזניץ שליט"א פון ירושלים, און איידעם ביי הגה"צ ר' מנחם שלמה האגער שליט"א, בנו הגדול פון כ"ק אדמו"ר מוויזניץ שליט"א פון לאנדאן.
אין די צייט וואס דער וויזניצער רבי פון ירושלים האט אויסגעדרוקט זיין רצון ארויסצופארן קיין לאנדאן מבקר חולה זיין ביים ברודער דער וויזניצער רבי פון לאנדאן, וועלכער געפונט זיך ליידער די לעצטערע וואכן אין א גאר שוואכע געזונט צושטאנד, און איז אנגעוויזן אויף רחמי שמים, איז באשטעטיגט געווארן אז די שמחת הקידושא רבא וועט פארקומען דעם שבת בצל הקודש פונעם עלטער זיידן דער וויזניצער רבי פון לאנדאן, און דער וויזניצער רבי פון ירושלים וועט קומען צו פארן מיטהאלטן די שמחה און מבקר חולה זיין ביים ברודער.
מארגן מיטוואך וועט זיך דער רבי שליט"א ארויסלאזן אין וועג, און זיין צוגאסט אין לאנדאן ביז זונטאג, און פראווענען דעם שבת אין ביהמ"ד הגדול וויזניץ. דורכאויס די טעג וועט דער רבי שליט"א זיך דורכרעדן מיט די ארטיגע פראפעסארן צו פארזיכערן די בעסטע באהאנדלונגען פארן ברודער דער רבי פון לאנדאן, ער זאל צוריקקומען צו די כוחות בבריות גופא ונהורא מעליא.
