כ"ק אדמו"ר מוויזניץ שליט"א פון מאנסי וועט דעם דינסטאג אפרייזן אויף א בליץ באזוך פון עטליכע שעה קיין טאראנטא, אינאיינעם מיט א געקליבענע צאל פון ארום פערציג נגידים בעם, וואו עס וועט פארקומען א ספעציעלע "ועידת הבונים", כאות הוקרה פאר די תומכים לטובת די מבצר קרית הישיבה אין נייעק.
דער רבי שליט"א אינאיינעם מיט די פמליא נכבדה וועלן ארויספארן דינסטאג מיטאג מיט א פריוואטע פליגער פון די נוארק לופטפעלד אין ניו דזשערזי, אנקומענדיג קיין טאראנטא וועט מען תיכף צופארן צום שטוב פון הנגיד המרומם ר' יעקב אשר פעלדמאן הי"ו, דער בריח התיכון און בונה ומקים פון ישיבת וויזניץ אין נייעק, צוערשט וועט פארקומען א עלעגאנטע מעמד קבלת פני האורחים, וואו דער בעל אכסניא וועט אויפטרעטן, און דער באגאבטער רעדנער הרב ישראל שטערן הי"ו פון לאנדאן.
שפעטער נאכמיטאג וועט פארקומען א מסיבת הוקרה אינאיינעם מיט די נדיבים בעם, צוזאמען מיט די עריכת השולחן לכבוד פסח שני, שפעט ביינאכט וועט דער רבי און די פמליא זיך ארויסלאזן אויפן וועג צוריק קיין ניו יארק מיטן פריוואטע פליגער.
