חסידי וויזניץ מאנסי גרייטן זיך מיטצולעבן א זעלטן געהויבענע שבת פון הרחבת גבולי הקדושה, ווען נאך עטליכע יאר זינט די אפקויף און די גרינדונג פון די קרית הישיבות אין נייעק, גרייט מען זיך אויף די גרויסע שבת חנוכת הבית וואס וועט געפראוועט ווערן במקהלות עם רב חסידים ואנשי מעשה, אין שפיץ פונעם נשיא המוסדות און נשיא הקריה כ"ק אדמו"ר מוויזניץ שליט"א פון מאנסי.
ווי באקאנט האט די וויזניצע מוסדות אין מאנסי אפגעקויפט א ריזן שטח אין נייעק מיט עטליכע יאר צוריק, אוועקצושטעלן א ריכטיגע אכסניא פאר די ישיבות הקדושות אמרי חיים וויזניץ, די ישיבה גדולה און ישיבה גבוה פאר די עלטערע בחורים, דריי באזונדערע ישיבה קטנה'ס און נאך עטליכע ישיבות פון אנדערע קרייזן וואס דינגען ארויס בנינים פאר זייער געברויך.
מאמענטאל זענען שוין רוב ישיבות איינקוואטירט אינעם גיגאנטישן קאמפלעקס אין נייעק, אויסער איין אפטיילונג פון די ישיבה קטנה וואס געפונט זיך אין קרית קאשוי אין בעדפארד היללס, און נאך לענגערע בוי ארבעט און רענאוואציעס איז שוין באנייעט געווארן א פרעכטיגע בנין "בית נחום" פאר די ישיבה גדולה, און א הערליכע בנין "בנין חיים מאירים" פאר די ישיבה קטנה ווערט פארענדיגט כלול בהדרו אין די יעצטיגע וואכן.
די גרויסארטיגע שבת חנוכת הבית וועט פארקומען דעם קומענדיגן שבת קודש פרשת נח שבת ראש חודש חשון, וואו עס איז ערווארטעט א ריזן ציבור חסידים פון נאנט און ווייט זיך מיטצופרייען מיט די הרחבת גבולי הקדושה, ובראשם דער מנהיג העדה כ"ק אדמו"ר מוויזניץ שליט"א פון מאנסי.
היינט מאנטאג איז אריין אין קראפט די פאקטישע צוגרייטונגען מיט איינשרייבן די ציבור המשתתפים וואס וועלן אנטייל נעמען ביים גרויסן שבת, א ברייטע הכנסת אורחים אפאראט איז געווארן אונטערגענומען צו קענען פלאצירן דעם ריזן ציבור אין די בניני הישיבה והמוסדות, אין צוגאב צו באקוועמע דירות פאר די צענדליגע נדיבים בעם וואס האבן זיך געלאזט קאסטן גרעסערע סכומים אוועקצושטעלן דעם אכסניא של תורה בהדרת כבוד.
די צענטראלע מעמד וועט פארקומען א טאג דערויף זונטאג פרשת לך לך, ווען עס וועט געפייערט ווערן די מעמד חנוכת הבית במקהלות אלפי ישראל, אינאיינעם מיט א מעמד הכנסת ספר תורה וואס ווערט אריינגעגעבן צום היכל הישיבה, נדבת לבו פון הנגיד החסיד ר' יעקב אשר פעלדמאן הי"ו פון טאראנטא, בונה ומקים פון די בניני הישיבות אין נייעק.
