חסידי וויזניץ פון איבער גרעיטער ניו יארק און ניו דזשערזי נעמען אויף מיט פרייד די מעלדונג אז אין צוויי וואכן ארום וועט פארקומען א גרויסארטיגע חגיגה פאר כלל חסידי וויזניץ, סיום מסכת ברכות והתחלת סדר מועד במסגרת הלימוד מאמר מרדכי, לזכר נשמתו פון כ"ק אדמו"ר הרה"ק בעל תורת מרדכי מוויזניץ זי"ע.
די סדר הלימוד מאמר מרדכי פאראייניגט טויזענטער וויזניצע חסידים פון איבער די גאנצע וועלט, נאנט צו דריי טויזענט לומדים וואס האבן שוין גענומען די בחינות, און ווי פארשטענדליך איז פארהאן נאך פילצאליגע לומדים אין אלגעמיין, שטייענדיג גענוי זיבן יאר זינט די וויזניצע רביים האבן אוועקגעשטעלט דעם סדר הלימוד.
פארגאנגענעם ווינטער איז געווען געפלאנט א גרויסע מעמד התחלת הש"ס במעמד קהל רב, וואס האט געזאלט צונויפברענגען אלפי חסידי וויזניץ אין שפיץ פון אלע אכט ברידער כ"ק האדמורי"ם מוויזניץ שליט"א, למעשה איז עס נישט צושטאנד געקומען צוליב פארשידענע סיבות, און אצינד ווען מען גרייט זיך צו ענדיגן די ערשטע מסכתא אינעם סדר הש"ס, און אנהייבן סדר מועד מיט א פרישקייט, איז באשטעטיגט געווארן אז די פאראייניגטע מעמד וועט בעז"ה פארקומען אין א מזל'דיגע שעה.
די גרויסע חגיגה וועט פארקומען זונטאג פרשת בלק הבעל"ט, בלויז צוויי טעג נאך וואס מען איז מסיים מסכת ברכות און מען הייבט אן מסכת שבת אינעם סדר הלימוד, די מעמד וועט פארקומען אין די נייע פראכטפולע עטרת ווערטהיימער זאל אין די המספיק רעזארט אין די קעטסקיל בערג, א סטראטעגיש ארט אין די קאנטרי ווען א גרויס טייל פון די וויזניצע חסידים וויילן אין די קאנטרי, עס איז בלויז צען מינוט צו פארן פון קרית וויזניץ קייאמישע, און איז ווייניגער ווי א שעה צו פארן פון מאנסי.
די פראכטפולע המספיק רעזארט אין ראקהיל איז לעצטנס פארענדיגט געווארן, און אין די לעצטערע וואכן האט מען באנייעט די שפאגל נייע עטרת ווערטהיימער זאל, וואס פארמאגט גאנצע צוואנציג טויזענט סקווער פיס, און אצינד וועט בעז"ה פארקומען דארט די ערשטע דרויסענדיגע מעמד במקהלות אלפי חסידי וויזניץ, וואס וועט בעז"ה באשיינט ווערן דורך די ברידער כ"ק מרנן האדמורי"ם מוויזניץ שליט"א.
