שטייענדיג בעפאר יו"ט סוכות איז אונטערגענומען געווארן א ערנסטע פראיעקט בחצר הקודש וויזניץ אין מאנסי, וואו עס ווערט אויפגעבויעט א נייע גרויסע סוכה פאר די טישן דורכאויס יו"ט סוכות און די ימי חול המועד, וואס ווערט געפראוועט יאר יערליך מיט גרויס דערהויבענקייט.
ביז היינט איז די סוכה הגדולה געווען אין די ווייבער שוהל פון ביהמ"ד הגדול, און שוין לאנגע יארן וואס עס איז נישטא גענוג פלאץ פארן ציבור חסידים צו קענען מיטהאלטן די טישן, וואס ווי באקאנט טוען די וויזניצע רביים אפרעכטן זעכצן טישן אין די סוכה, צוויי טישן יעדן טאג, אויך אין די חול המועד טעג, שלש סעודות שבת חול המועד, און די גרויסע קידוש ביום שמיני עצרת ווען מען געזעגנט זיך פון די סוכה כנהוג.
די נייע סוכה ווערט אויפגעבויעט ביים ווינקל פון פיליס טערעס און עליאט קט, הארט נעבן די בנין ביהמ"ד הגדול לבוש מרדכי און די גרויסע בנין פון די היכל הטישן און די מקוה, די בוי ארבעט נעמט אריין צו גראד מאכן דעם גאנצן שטח, וואס וועט דורכאויס די יאר פארוואנדלט ווערן אין א פארקינג לאט, און דערויף ציהט מען ארויף הויכע זוילן צו אונטערהאלטן די סוכה דורכאויס די ימי החג, מיט גענוג פלאץ פאר הויכשטאקיגע פארענטשעס און אלעס וואס פעלט זיך אויס.
ווען דער וויזניצער רבי שליט"א האט געגעבן די הסכמה אויפצובויען די נייע גרויסע סוכה, האט דער רבי פארלאנגט אז מען זאל זיכער מאכן אז די גאנצע סוכה זאל זיין כשר אויסגעהאלטן, נאך וואס ביי די אלטע סוכה איז געווען א חלק וואס איז נישט געווען אונטער די סכך, און כסדר האט מען געדארפט זיכער מאכן אז מענטשן זאלן נישט נכשל ווערן און עסן מחוץ לסוכה.
