א ביטערע געשיכטע האט זיך אפגעשפילט היינט מיטאג אין לאנדאן, ווען א טעראריסט האט זיך א לאז געטאן אויף אידישע קינדער אין די גאלדערסגרין געגנט, און געשטאכן צוויי אידן אויף א שווערע פארנעם, פרובירנדיג צו שטעכן נאך אנדערע, בעפאר ער איז געווארן אראפגעהאלטן דורך שומרים וואלאונטירן.
די שטעכעריי טעראר אטאקע האט פאסירט ביים ווינקל פון די פארנומענע גאלדערסגרין ראוד און וואודלענדס ראוד, ווען דער טעראריסט מיט א שארפע מעסער האט געשטאכן צוויי אידן און זיי שווער פארוואונדעט, שומרים וואלאונטירן וואס זענען אנגעקומען ביז געציילטע סעקונדעס האבן פרובירט אראפצוהאלטן דעם טעראריסט וועלכער האט זיך פרובירט ארויסצודרייען, און ווען די פאליציי איז אנגעקומען האבן זיי געשאסן מיט א טעיזער גאן אויפן טעראריסט און אים שווער פארוואונדעט.
לויט די באריכטן פון די ענגלישע נייעס קוועלער, זענען די צוויי פארוואונדעטע שוין אין א סטאבילע צושטאנד, זייער נאמען צו מתפלל איז שלמה בן חיה, און נחמן משה בן חי' שרה לרפו"ש. די גאס ארום איז געווארן פארשלאסן פאר אויספארשונגען, און פון די לאקאלע פאליטיקאנטן, אריינגערעכנט דער פרעמיער מיניסטער קיער סטארמער, האט מען געהערט שארפע פארדאמונגען.
