כ"ק אדמו"ר מוויזניץ שליט"א פון מאנטריאל איז נעכטן זונטאג אנגעקומען צוגאסט קיין ניו יארק, צו באשיינען עטליכע משפחה שמחות, און אויפנעמען קהל חסידיו מיט קוויטלעך לקראת די ימי הרחמים והרצון הממשמשים ובאים.
דער רבי איז אנגעקומען נעכטן מיטן פליגער קיין ניו יארק, און זיך משתתף געווען ביי די שמחת החתונה בבית הנגיד החסיד ר' חיים יוסף ליסויער הי"ו מנכבדי הקהילה אין מאנטריאל, אויך האט דער רבי זיך באטייליגט ביי די לוויה פון כ"ק אדמו"ר הרה"ק מסקולען זצ"ל, און אנגעהויבן די סדרי קבלת קהל בבית האכסניא אין שטוב פון הנגיד החסיד ר' חיים מאיר ציג הי"ו.
היינט נאכמיטאג וועט זיך דער רבי באטייליגן ביי די קבלת פנים און חופה בחצר הקודש סקווירא, די חתן אייניקל ביים רבינ'ס שוואגער הגה"צ ר' אהרן מענדיל טווערסקי שליט"א. דערנאך וועט דער רבי אריינפארן קיין וויליאמסבורג צו באשיינען די שמחת החתונה בחצר הקודש פאפא, די כלה א טאכטער פונעם רבינ'ס שוואגער הגה"צ ר' מאיר גרינוואלד שליט"א דומ"ץ פאפא.
דער רבי וועט פארבלייבן אין וויליאמסבורג פאר עטליכע טעג, און אויפנעמען די חסידים מיט קוויטלעך אין ביהמ"ד הגדול וויזניץ אין וויליאמסבורג, און אין שטוב פון די אכסניא ביי הנגיד החסיד ר' מאיר פישמאן הי"ו. מארגן דינסטאג וועט פארקומען אין וויזניצע ביהמ"ד אין וויליאמסבורג א מסיבה נהדרה לטובת די וויזניצע מוסדות אין מאנטריאל, אין שפיץ פון ביידע רבי'ס כ"ק האדמורי"ם מוויזניץ שליט"א פון וויליאמסבורג און מאנטריאל.
דעם דאנערשטאג וועט דער רבי אנקומען אויף א תפילת רבים ביים ציון הק' פונעם פאטער הרה"ק בעל תורת מרדכי מוויזניץ זי"ע, לקראת די הייליגע טעג הממשמשים ובאים.
דעם קומענדיגן שבת וועט דער רבי וויילן אויף א פארמאכטע פארנעם אין וואודרידזש, מאנטאג וועט דער רבי צוריקקומען קיין וויליאמסבורג און באשיינען די שמחת החתונה בחצר הקודש סאטמאר, די כלה א טאכטער פונעם רבינ'ס שוואגער הגה"צ ר' אפרים אהרן טייטלבוים שליט"א ראה"כ צעהלים, אזוי אויך וועט דער רבי באשיינען עטליכע חתונות פון אייניקלעך ביים פאטער הרה"ק בעל תורת מרדכי מוויזניץ זי"ע וואס קומט פאר די קומענדיגע וואך.
