כ"ק אדמו"ר מאלכסנדר שליט"א איז אנגעקומען אויף א לענגערע באזוך בקרב חסידיו אין ארץ ישראל, צו באשיינען די מעמד חנוכת הבית פאר די נייע אלכסנדר שטיבל בית החסידים אין שטאט ביתר עילית.
ווי באקאנט האט דער רבי שליט"א א גרויסע ציבור חסידים אין ארץ ישראל, וואס קומען כסדר צו פארן קיין בארא פארק להסתופף בצל הקודש, דער רבי פארט אסאך קיין ארץ ישראל צו משפיע זיין אויף די ארטיגע חסידים פונדערנאנט, הויפטזעכליך אינעם עיר התורה והחסידות בני ברק וואו עס איז פארהאן א שיינע אלכסנדר בית המדרש מיט צענדליגע חסידים ומתפללים.
אצינד ווען די קהילה קדושה פארברייטערט זיך, מיטן באנייען א פראכטפולע בית המדרש אין שטאט ביתר פאר די חסידים וואס וואוינען דארט, האט דער רבי אונטערגענומען א לענגערע נסיעה צו מיטהאלטן און באשיינען די גרויסע חגיגה, וואס וועט געפייערט ווערן דעם מוצאי שבת קודש במקהלות עם רב ברוב פאר והדר.
שבת קודש וועט דער רבי פראווענען בקרב חסידיו אין שטאט בני ברק, און דורכאויס די וואך איז פארהאן זמני קבלת קהל בקודש פנימה פאר אלע חסידים.
