נאך לאנגע חדשים פון הכנות שטייט מען שוין אצינד געציילטע טעג איידער די גרויסארטיגע מסע הקודש וואס כ"ק אדמו"ר מסאטמאר שליט"א נעמט אונטער קיין אנטווערפן בעלגיע, צו מיטהאלטן פונדערנאנט די געוואלדיגע הרחבת גבולי הקדושה, און משפיע זיין פאר קהל חסידיו תושבי העיר פונדערנאנט.
צוויי היסטארישע מעמדים פארנעמען דעם אויבן אן פון די גרויסע מסע הקודש, צוערשט די מעמד הנחת אבן הפינה פאר די נייע בנין בית המדרש הגדול והחדש דקהל יטב לב ד'סאטמאר, וואס וועט אפגעראכטן ווערן דעם קומענדיגן דינסטאג וישלח ברוב פאר והדר. דערביי וועט פארקומען די מעמד סיום מסכת חולין והתחלת מסכת בכורות וואס איז געלערנט געווארן אין ראם פון חבורת זכרו דחסידי סאטמאר.
די צווייטע גרויסע מעמד איז די חגיגת חנוכת הבית פאר די נייע בנין התלמוד תורה ד'סאטמאר בנין עסטרייכער, וואס איז מיט גרויס הארעוואניע פארענדיגט געווארן כלול בהדרו, צו דינען אלס פאסיגע אכסניא של תורה פאר די צעירי הצאן די תינוקות של בית רבן. די מעמד וועט פארקומען אויפן ריזן שטח נעבן די בנין התלמוד תורה.
מאנטאג אינדערפרי נאך וואס דער רבי וועט מופיע זיין בשערי העיר, וועט דער רבי דאווענען שחרית ברוב עם אין סאטמארער בית המדרש, נאכגעפאלגט מיט א מעמד קבלת פנים דורך די ציבור חסידים. אויפדערנאכט וועט פארקומען א רייכע מסיבה פאר די חסידים תושבי העיר לטובת די קרן הבנין פון די נייע בית המדרש.
דינסטאג אינדערפרי וועט דער רבי דאווענען שחרית בין כותלי ישיבה קטנה תורה ויראה ד'סאטמאר אינאיינעם מיט די בחורים, אויפדערנאכט וועט פארקומען די מעמד הנחת אבן הפינה און כינוס חסידי סאטמאר באייראפע.
מיטוואך אינדערפרי וועט דער רבי דאווענען שחרית בבנין התלמוד תורה אינאיינעם מיט די טייערע קינדערלעך, שפעטער וועט דער רבי אפשטאטן באזוכן אין די סאטמארע כולל, און אין די בית חינוך לבנות בית רחל. שפעטער ביינאכט וועט פארקומען די גרויסארטיגע מעמד חנוכת הבית פאר די בנין התלמוד תורה.
די קורצע באזוך פון דריי טעג וועט זיך שליסן דאנערשטאג אינדערפרי, ווען דער רבי וועט זיך ארויסלאזן אויפן וועג צוריק אהיים קיין ניו יארק, איבערלאזנדיג השפעות טובות פאר די ארטיגע חסידים.
