אין די צייט וואס אידישע קינדער זענען מתפלל לרפואתו השלימה פון כ"ק אדמו"ר מוויזניץ שליט"א פון לאנדאן, וועלכער איז זייער אפגעשוואכט די לעצטערע חדשים, איז היינט באשטעטיגט געווארן דורך דעם רבינ'ס מקורבים אז דער רבי וועט אפרייזן קיין אמעריקע פאר די קומענדיגע תקופה, מיטן האפענונג אויף בעסערע רעזולטאטן מיטן אויבערשטנס הילף.
דער רבי שליט"א געפונט זיך אצינד על אם הדרך, די פליגער הייבט זיך פינף דרייסיג נאכמיטאג לאנדאנע זייגער, און וועט בעז"ה לאנדן אין ניו יארק ארום אכט אזייגער אויפדערנאכט. אין די קומענדיגע טעג וועט דער רבי דורכגיין א רייע מעדיצינישע אונטערזוכונגען אין די מאונט סיני שפיטאל אין מאנהעטן, וואו די פראפעסיאנאלע דאקטוירים וועלן אבזערווירן דעם רבינ'ס מצב און האפענטליך טרעפן א פאסיגע באהאנדלונג צו קענען צוריקברענגען דעם רבי'ן צו די כוחות.
אין לויף פון די קומענדיגע וואכן וועט זיך דער רבי אויפהאלטן אין קרית וויזניץ קייאמישע לעיק, אין שטוב פון בנו הגדול הגה"צ ר' מנחם שלמה האגער שליט"א, דער רבי וועט זיין פריוואט אן קיין עפנטליכע טישן אדער מעמדים, און לויט די יעצטיגע פלענער וועט דער רבי וויילן אויף יו"ט שבועות אין קרית וויזניץ קייאמישע.
היינט מיטאג איז דער רבי שליט"א אריינגעקומען אויף תפילת מנחה אין ביהמ"ד הגדול וויזניץ אין לאנדאן, וואו עס זענען געווען פארזאמלט פילע חסידים ותושבי העיר, און די בחורי הישיבות דחסידי וויזניץ. נאך מנחה האט אויפגעטרעטן מיט קורצע ווערטער הרב החסיד ר' שלמה טויסיג הי"ו וועלכער האט איבערגעגעבן ווארעמע וואונטשן פארן רבי'ן אין נאמען פון אלע חסידים, דער רבי זאל צוריקקומען צו די כוחות און קענען אהיימקומען ווי שנעלער געזונטערהייט. דערנאך זענען אלע אריבער ביים רבי'ן זיך געזעגענען, אין די צייט וואס מען זינגט ניגוני ל"ג בעומר און כי בשמחה תצאו.
