אין די צייט וואס כ"ק אדמו"ר מוויזניץ שליט"א פון לאנדאן געפונט זיך צוגאסט אין אמעריקע לצורך מנוחה, איז אין די טעג באשטימט געווארן אז דער רבי שליט"א וועט אריבערגיין א מעדיצינישע באהאנדלונג אין שפיטאל מיטן האפענונג צו פארגרינגערן דעם רבינ'ס מצב, דער רבי זאל מיטן אויבערשטנס הילף צוריקקומען צו די כוחות לאיתנו הראשון.
ליידער האט דער רבי זיך נישט פולקאם ערהוילט נאכן מיטמאכן א שווערע דורכגאנג מיט די ביטערע מחלה ה"י עטליכע יאר צוריק, איבערהויפט אין די לעצטע פאר חדשים ווען דעם רבינ'ס געזונט צושטאנד איז היבש שוואך, און דער רבי איז נישט בכח צו פראווענען די תפילות און טישן ווי געווענליך מפאת חולשתו.
מיט צוויי חדשים צוריק איז דער רבי אנגעקומען קיין ניו יארק לצורך מנוחה, זיך אויפצוהאלטן נאנט צו די קינדער אויף א פארמאכטע פארנעם, דער רבי האט געוויילט עטליכע וואכן אין קרית וויזניץ קייאמישע לעיק, בבית בנו הגדול הגה"צ ר' מנחם שלמה האגער שליט"א, און די לעצטע צוויי וואכן וויילט דער רבי אין מאנסי בבית בנו הגה"צ ר' לוי יצחק האגער שליט"א, ווען די שבתים פראוועט דער רבי אינאיינעם מיט זיינע עלטערע ברידער מרנן האדמורי"ם שליט"א.
דורכאויס די תקופה וואס דער רבי האלט זיך אויף אין אמעריקע, איז דורכגעפירט געווארן פארשידענע אונטערזוכונגען און מערערע באראטונגען מיט הויכראנגיגע פראפעסארן אין די ניו יארקער שפיטעלער, מיטן האפענונג צו דערגיין די אורזאך פונעם רבינ'ס שוואכקייט און עס קענען באהאנדלען. אין די יעצטיגע טעג איז באשטימט געווארן דורכצופירן א געוויסע פראצעדור אויפן קאפ וואס קען געדויערן עטליכע טעג, מיטן האפענונג אז עס זאל עושה רושם זיין לטובה און דער רבי זאל זיך ערהוילן ווי שנעלער בס"ד.
מארגן מאנטאג וועט דער רבי אריינפארן צו די מאונט סיני שפיטאל אין מאנהעטן, וואו דער רבי וועט זיך אויפהאלטן די קומענדיגע טעג און באהאנדלט ווערן דורך די ארטיגע דאקטוירים, אין די צייט וואס אידישע קינדער וועלן מרבה זיין בתפילה למען בריאתו השלימה פונעם רבי'ן, כ"ק מרן דוד בן סימא מירל בתוך שאר חולי ישראל.
