אין די צייט וואס כ"ק אדמו"ר מוויזניץ שליט"א פון לאנדאן געפונט זיך אין ניו יארק דורכאויס די יעצטיגע חדשים, מיטן האפענונג צו פארבעסערן דעם רבינ'ס געזונט צושטאנד וואס איז היבש אפגעשוואכט די לעצטע פאר יאר, איז באשטעטיגט געווארן איבער א פרישע פראצעדור וואס וועט ווערן דורכגעפירט דעם סוף וואך, מיטן האפענונג אז עס זאל עושה רושם זיין לטובה.
דער רבי שליט"א וועלכער געפונט זיך שוין אין ניו יארק מער ווי צוויי חדשים, איז אריבער א רייע אונטערזוכונגען דורך הויכראנגיגע פראפעסארן, וואס אבזערווירן דעם רבינ'ס געזונט צושטאנד, נאך וואס דער רבי האט געליטן פון די ביטערע מחלה ה"י מיט דריי יאר צוריק, און האט זיך ל"ע נאכנישט פולקאם ערהוילט פון די שווערע נאכווייען. מיט צוויי וואכן צוריק איז דער רבי אריבער באהאנדלונגען אין די מאונט סיני שפיטאל, און בחסדי ה' האט עס געוויזן געוואונטשענע רעזולטאטן.
אצינד האבן די דאקטוירים באשטעטיגט דורכצופירן א פרישע פראצעדור, איינצושטעלן א פולשטענדיגע מיטל וואס זאל אפהאלטן אומנויטיגע אנטוויקלונגען, וואס וועט מיטן אויבערשטנס הילף שטארק פארבעסערן דעם רבינ'ס מצב אין פילע הינזיכטן, דער רבי זאל צוריקקומען צו די כוחות לאיתנו הראשון.
די אפעראציע איז באשטימט אויף דעם דאנערשטאג הבעל"ט, ווען דער רבי וועט זיך אויפהאלטן אין שפיטאל פאר צוויי טעג, אידישע קינדער זענען מתפלל לרפואת כ"ק מרן דוד בן סימא מירל בתוך שאר חולי ישראל.
פארגאנגענעם שבת פרשת בלק האט דער וויזניצער רבי שליט"א געוויילט אין וויליאמסבורג, בצל הקודש פון זיין גרויסן שווער כ"ק אדמו"ר מקאלוב שליט"א לרפו"ש. דער רבי האט געהאט די אכסניא בביתו נאוה קודש פונעם שווער דער קאלובער רבי, און האט מיטגעהאלטן אלע תפילות און טישן בצל קדשו, געפראוועט די סעודות שבת אויף א פריוואטע פארנעם מיט די בני המשפחה, און ביי די טישן מכובד געווארן מיט גרויס כבוד דורך די רבנים ומשמשים בקודש. פרייטאג צונאכטס האט דער רבי געדאווענט פארן עמוד קבלת שבת, און ביים טיש האט מען געזינגען א רייע זמירות און ניגונים לבית וויזניץ. אזוי אויך האט דער רבי געזאגט תורה סיי ביים טיש פרייטאג צונאכטס און סיי ביי שלש סעודות.
