כ"ק אדמו"ר מוויזניץ שליט"א פון לאנדאן וועלכער האלט זיך אויף אין די יעצטיגע תקופה אין ניו יארק לצרכי רפואה, וועט היינט דאנערשטאג ארויספארן קיין מאנטריאל קאנאדע, צו באשיינען א שמחה במעון קדשו, שמחת הברית פון א אור אייניקל, בן הנולד ביי הרב לייבוש האגער שליט"א, זון פונעם רבינ'ס זון הגה"צ ר' יעקב יוסף האגער שליט"א, און איידעם ביים רבינ'ס ברודער כ"ק אדמו"ר מוויזניץ שליט"א פון מאנטריאל.
דער וויזניצער רבי פון מאנטריאל האט איינגעלאדנט אחיו הגדול ומחותנו דער וויזניצער רבי פון לאנדאן צו קומען באשיינען די שמחה, און גלייכצייטיג זיך אפרוען אין די קאנאדישע בערג אין די קוט סט. לוק געגנט נעבן מאנטריאל, וואו דער וויזניצער רבי פון מאנטריאל האלט זיך אויף אין לויף פון די זוממער וואכן אויף אפרוה.
היינט דאנערשטאג נאך מנחה וועט דער וויזניצער רבי פון לאנדאן ארויספארן די וועג פון עטליכע שעה קיין מאנטריאל, אנקומענדיג קיין מאנטריאל וועט דער רבי האבן די אכסניא אין שטוב פון הרב החסיד ר' חיים יוסף ליסויער הי"ו, הארט קעגן איבער ביהמ"ד הגדול וויזניץ. שבת קודש וועט דער רבי פראווענען אין ביהמ"ד הגדול וויזניץ אין מאנטריאל, אינאיינעם מיטן ברודער און מחותן דער וויזניצער רבי פון מאנטריאל, און פרייטאג צונאכטס וועט פארקומען די שמחת השלום זכר פונעם בשותפות'דיגן אייניקל.
נאך שבת וועט דער רבי ארויספארן צו די קוט סט. לוק געגנט, און צוריקקומען קיין מאנטריאל צום שמחת הברית וואס קומט פאר קומענדיגן דינסטאג בעז"ה אין ביהמ"ד הגדול דקהל אהבת ישראל וויזניץ. שפעטער אין וואך וועט זיך דער רבי צוריקקערן קיין ניו יארק, וואו דער רבי וועט וויילן לויטן פלאן ביז אנהייב חודש אלול הבעל"ט.
