חסידי וויזניץ אין אמעריקע גרייטן זיך ווידער צו מקבל פנים זיין בהדרת כבוד כ"ק אדמו"ר מוויזניץ שליט"א פון לאנדאן, וועלכער איז ערווארטעט אויף א געהויבענע באזוך אין ניו יארק די קומענדיגע וואך, לפאר על ראש שמחתו, צו באשיינען די שמחת החתונה פון א אייניקל.
ווי באקאנט איז דער רבי שליט"א געווען צוגאסט אין ניו יארק דורכאויס די זוממער חדשים, ווען דער רבי האט זיך אויפגעהאלטן דאהי לצרכי רפואה, בחסדי ה' האט זיך אנטוויקלט א שטארקע פארבעסערונג אינעם רבינ'ס געזונט צושטאנד, און די פארלאפענע ירח האיתנים איז אריבער פיל בעסער ווי ערווארטעט ב"ה.
אצינד גרייט זיך דער רבי ווידער צו קומען קיין ניו יארק, דאסמאל פאר א פרייליכע סיבה, צו באשיינען די שמחת החתונה פון א אייניקל. דעם קומענדיגן מוצאי שבת קודש פרשת ויצא, וועט דער רבי ארויספארן ממעון קדשו אין לאנדאן, און וויילן אין אמעריקע פאר א פולער וואך, צוערשט אין מאנסי און דערנאך אין וויליאמסבורג.
מאנטאג פרשת וישלח וועט פארקומען די שמחת החתונה פונעם רבינ'ס אייניקל, די כלה א טאכטער פון זיין זון הגה"צ ר' יעקב יוסף האגער שליט"א, איידעם ביי הגה"צ ר' ישכר דוב טויב שליט"א אבד"ק זכרון נפתלי ארי' נעשכיז, מיט די חתן א אייניקל פון אחיו הגדול כ"ק אדמו"ר מוויזניץ שליט"א פון מאנסי, א זון פון זיין זון הגה"צ ר' דוד דוב האגער שליט"א פון בארא פארק. די חתונה קומט פאר ברוב פאר והדר אין ביהמ"ד הגדול וויזניץ אין מאנסי.
אנקומענדיג קיין ניו יארק מוצאי שבת ויצא שפעט ביינאכט, וועט דער רבי אריינפארן קיין מאנסי לבית האכסניא ביי הנגיד החסיד ר' יעקב יהושע פיש הי"ו, און פארבלייבן אין מאנסי די ערשטע פאר טעג, צו באשיינען די שמחת החתן מאהל זונטאג נאכט, און די שמחת החתונה מאנטאג. שפעטער אין וואך וועט דער רבי אריינפארן קיין וויליאמסבורג, וואו עס וועט געפראוועט ווערן א געהויבענער שבת של שמחה, די שבת שבע ברכות פונעם רבינ'ס אייניקל, בבית מדרשו פונעם עלטער זיידן כ"ק אדמו"ר מקאלוב שליט"א.
זונטאג פרשת וישב וועט זיך דער רבי שליט"א אומקערן אהיים למעון קדשו אין לאנדאן, אין די צייט וואס מען גרייט זיך שוין אויף א נאך א נסיעה וואס דער רבי וועט אונטערנעמען קיין ניו יארק, אויך לכבוד די שמחת החתונה פון א אייניקל, וואס קומט פאר קומענדיגן חודש שבט אין ביהמ"ד הגדול וויזניץ אין מאנסי, ווען דער רבי וועט פראווענען צוויי שבתים של שמחה אין ביהמ"ד הגדול וויזניץ אין מאנסי.
