פון ארץ ישראל קומט היינט אן די ביטערע בשורה איבער די פריצייטיגע פטירה פון הגאון הגדול רבי יוסף זאב פיינשטיין זצ"ל ראש ישיבת עמלה של תורה, ומגדולי מרביצי תורה אין שטאט ביתר, וועלכער איז נפטר געווארן היינט מיטאג אין ארץ ישראל אין בליענדן עלטער פון פיר און פופציג יאר.
דער ראש ישיבה זצ"ל איז געווען א זון פון הרב ארי' פיינשטיין ז"ל מחשובי חסידי קרעטשניף אין בני ברק, און א איידעם ביי הרב ר' מאיר ראזענבוים ז"ל פון לעיקוואד. מיט יארן צוריק האט ער משמש געווען אלס משפיע אין די קרעטשניפער ישיבה אין רחובות, ביז ער האט אליינס געעפנט א ישיבה פאר חסידישע בחורים אין ירושלים, און זיך שפעטער אריבערגעצויגן קיין ביתר וואו ער האט ווייטער מרביץ תורה געווען פאר טויזענטער תלמידים און זיי באגלייט אויפן לעבן מיט א זעלטענע געטריישאפט.
ליידער איז דער ראש ישיבה קראנק געווארן מיט די ביטערע מחלה ה"י, און פאר עטליכע חדשים האט ער זיך ל"ע געמוטשעט מיט שווערע יסורים, ווען אינצווישן האט מען צוגעלייגט דעם נאמען אלטר לרפואה. היינט אבער נאך וואס די מצב האט זיך שטארק פארערגערט אין די לעצטע פאר טעג, האט דער ראש ישיבה צוריקגעגעבן זיין ריינע נשמה ליוצרה, צום טיפן צער און טרויער פון די טויזענטער תלמידים און בני המשפחה.
די מסע הלוויה קומט פאר היינט אויפדערנאכט בליל פורים 9:30 פון היכל ישיבתו עמלה של תורה אין שטאט ביתר, דערנאך ביי ביהמ"ד שבט הלוי אין ירושלים, און דערנאך וועט ער קומען לקבורה אויפן הר המנוחות אין ירושלים עיה"ק.
