טויזענטער חסידישע אינגעלייט שליסן זיך אן אין די חבורה, צו לערנען א עמוד א טאג, צו זיין א טייל צווישן צענדליגע טויזענטער לומדים
א גייסטרייכע איבערלעבעניש איז פארגעקומען דעם מאנטאג פרשת ויצא אויף די אמעריקאנער באדן, ווען עס איז געפראוועט געווארן די היסטארישע סיום אויף גאנץ סדר מועד, אין ראם פון די אלוועלטליכע תורה חבורה "אורייתא", וואו צענדליגע טויזענטער אידן זענען אנגעשלאסן צו לערנען א עמוד גמרא יעדן טאג, און זענען קובע עתים לתורה מיט א שטארקייט.
מפעל "אורייתא" איז אין די לעצטערע יארן אויסגעשטיגן אלס א פעסטע תורה חבורה, וואו צענדליגע טויזענטער אידן לערנען אינאיינעם א פרישע עמוד גמרא יעדן טאג, אין די צייט וואס מען חזר'ט איבער די נעכטיגע עמוד, צו קונה זיין די לימודים אויף א אייביגע פארנעם. די צאל לומדים שטייט שוין היינט אריבער פערציג טויזענט בליעה"ר, און שטייגט מיט יעדע פארבייגייענדע טאג.
די סדר הלימוד איז געבויעט צו לערנען צוויי און א האלב בלאט א וואך, די ערשטע פינף טעג פון די וואך לערנט מען א פרישע עמוד, און מען לערנט איבער די נעכטיגע עמוד, און פרייטאג און שבת איז געווידמעט אויף חזרה צו גוט קונה זיין די לימודים. יעדע צוויי וואכן קומט פאר א בחינה אויף פינף בלאט, און די לומדים זענען זיך מחי' דערמיט צו זעהן א קנין נצח.
ספעציעל ווערט געגעבן א גרויסע צאל שיעורים אויף דעם סדר לימוד, צוטיילט אויף פארשידענע שפראכן, פילע שיעורים ווערן געגעבן אויף די אידישע שפראך דורך אויסגערופענע מגידי שיעור, הרה"ג ר' משה אייכלער שליט"א, הרה"ג ר' אהרן מרדכי לובענסקי שליט"א פון לאנדאן, און הרה"ג ר' פנחס וואלהענדלער שליט"א א באקאנטער מגיד שיעור אין פארשידענע חבורות.
אין צוגאב צו די שיעורים וואס ווערן ארויסגעשיקט יעדן טאג דורך פארשידענע וועגן, קומט אויך ארויס א זעלטן רייכע קובץ "ילקוט אורייתא", וואס ענהאלט די בלעטער גמרא מיט די פירוש פון מתיבתא, הערליכע טבלאות מיט די תמצית הדף, וואס העלפט ארויס די לומדים צו גוט פארשטיין די גמרא און עס קונה זיין מיט א קלארקייט, אזוי אויך קומט עס מיט רייכע מראי מקומות. די קובצים ווערט פארטיילט בחנם, ערמעגליכט דורך די חשובע תומכי החבורה, ובראשם הנגיד המפורסם ר' שלמה יהודה רעכניץ הי"ו בריח התיכון פון די חבורה.
די אלע לומדי החבורה באקומען יעדן טאג א אימעיל מיט א רייכע קאלעקציע פון די שיעורים, אזוי אויך קען מען עס באקומען אויף נאך פארשידענע וועגן צו פארגרינגערן דאס לערנען.
די גייסטרייכע מעמד הסיום
ווי דערמאנט איז דעם מאנטאג פארגעקומען די גרויסע מעמד סיום סדר מועד והתחלת סדר נשים, די מעמד איז געפראוועט געווארן אין די גיגאנטישע קיור ארענא סטעדיום אין ניו דזשערזי, וואו עס האבן זיך באטייליגט טויזענטער חברי החבורה לומדים ומסיימים, און זייערע משפחה מיטגלידער וואס האבן זיך מיטגעפריידט בשמחת התורה.
א מעכטיגער קידוש השם האט אפגעהילכט אין זאל, ווען אזויפיל אידישע קינדער האבן אינאיינעם געפראוועט דעם סיום וכבוד התורה, די מעמד איז אהערגעשטעלט געווארן מיט גרויס פראכט דורך העסקן ר' שלמה שטיינמעטץ הי"ו פון די פיוואט גרופע, די לאגיסטישע חלקים איז צוגעשטעלט געווארן דורך די בארימטע וויי עף פראדאקשען פירמע, און די רענטעסטיק פארטי רענטל פירמע האט אהערגעשטעלט פילע איינריכטונגען לרווחת הציבור.
די אויבן אן איז באשיינט געווארן דורך פילע אדמורי"ם ורבנים וראשי ישיבות, צווישן זיי כ"ק אדמו"ר מראחמיסטריווקא שליט"א פון לעיקוואד, כ"ק האדמורי"ם מנאוואמינסק שליט"א, מרנן ורבנן ראשי ישיבת בית מדרש גבוה ד'לעיקוואד, הגה"צ ר' אברהם שארר שליט"א אב"ד נזר גדליהו, הגה"צ ר' יצחק אונסדארפער שליט"א אב"ד שבילי דוד, רבנים ומורי הוראה און נאך פיל.
הגאון הגדול רבי ירוחם אולשין שליט"א ראש ישיבה בית מדרש גבוה ד'לעיקוואד איז מכובד געווארן צו מאכן דעם סיום והדרן, הגה"צ ר' נח אייזיק אלבוים שליט"א אב"ד הומנא אין קיו גארדען היללס האט אויפגעטרעטן מיט א פייערדיגע דרשה, זייענדיג אליינס עומד בראש פון דעם הייליגן חבורה.
הגאון הגדול רבי ארון רייך שליט"א האט פארגעלערנט א שיעור בהתחלת מסכת יבמות, און געגעבן א פאסיגע הקדמה צו די קאמפליצירטע סוגיות אין מסכת יבמות צו קענען גוט פארשטיין די גמרא.
א טאלאנטפולע שורה פון בעלי מנגנים האבן דערהויבן דעם ציבור העכער און העכער, אין שפיץ פונעם מייסטער בעל מנגן ר' שלמה דאסקאל הי"ו, ר' הערשל וויינבערגער הי"ו, ר' אברהם בערקא הי"ו, און די באקאנטע שירה חסידישע כאר. אויך האט אויפגעטרעטן הנגיד המפורסם ר' שלמה יהודה רעכניץ הי"ו פטרון החבורה.
אין די יעצטיגע פאסיגע געלעגנהייט ווען מען הייבט אן סדר נשים, די שיעורים אין מסכת יבמות באגלייט מיט לעבעדיגע קלארע שילדערונגען, טוען נאך טויזענטער אידן זיך איינשרייבן צו זיין א טייל פון דעם אלוועלטליכן חבורה. זיך איינצושרייבן קען מען רופן:
1-914-8ORAYSA
אדער קען מען שיקן א אימעיל צו:
אדער אויפן וועבזייטל
ORAYSA.0RG
