מיט אומבאשרייבליכע התרגשות איז היינט געמאלדן געווארן מטעם הנהלת הקריה אין די וויזניצע שטעטל אין קייאמישע לעיק, אז דעם קומענדיגן זונטאג ל"ג בעומר הבעל"ט וועט אין א מזל'דיגע שעה פארגעקומען די מעמד הנחת אבן הפינה פאר די נייע דעוועלאפמענט וואס ווערט געבויעט אין שטעטל.
דאס קומט נאך לאנגע יארן פון האפענונג און ערווארטונג, שתדלנות און עסקנות ביי די שטאטישע אינסטאנצן, צו באקומען די נויטיגע פערמיטן אויפצובויען פרישע דירות אין שטעטל, א שריט וואס איז אנגעקומען ביטער שווער, אין די צייט וואס די איינוואוינער אין שטעטל האבן פשוט נישט געהאט קיין דירות וואו צו וואוינען, און אסאך פון די חתונה געהאטע קינדער האבן געמוזט ארויסמופן פון שטעטל.
אין די לעצטע דריי יאר איז פאראויסגעגאנגען דעם בוי פראיעקט, מיטן ערהאלטן די נויטיגע פערמיטן, אויסהאקן די ביימער, און צוגרייטן די באדן פאר אינפאסטראקטשער, און אצינד גרייט מען זיך שוין צו פראווענען די מעמד הנחת אבן הפינה וואס וועט פארקומען בעז"ה זונטאג ל"ג בעומר 5:30 נאכמיטאג.
די מעמד וועט פארקומען ביי די אונטערשטע טייל פון די שטח הבניה, הארט נעבן די גראסערי פון שטעטל, אין שפיץ פון כ"ק אדמו"ר מוויזניץ שליט"א פון קייאמישע וועלכער וועט פארזאגן די מזמורי תהלים כנהוג.
אזוי אויך קומט היינט פאר די עלעקשאנס אין שטעטל, וואו די איינוואוינער וועלן אריין א לאקאלע מעיאר און ווילעדזש טראסטיס, נאך די באשטעטיגונג פון די נייע "ווילעדזש אוו עטרת" אין קרית וויזניץ קייאמישע לעיק.
