בחצר הקודש וויזניץ אין קייאמישע לעיק איז דעם יום טוב שבועות געמאלדן געווארן די ערשטע דעטאלן איבער די בעפארשטייענדע מסע הקודש פון כ"ק אדמו"ר מוויזניץ שליט"א פון קייאמישע, וועלכער גרייט זיך אפצורייזן קיין ארץ ישראל לפאר על ראש שמחתו ביי די שמחת החתונה פון א אייניקל, וואס קומט פאר בעוד חודשיים ימים, ט"ז אב הבעל"ט אין שטאט בני ברק.
די שמחת החתונה פונעם רבינ'ס אייניקל, א טאכטער פון זיין איידעם הגה"צ ר' דוד טווערסקי שליט"א אב"ד טשערנאביל בית שמש, זון פון כ"ק אדמו"ר מטשערנאביל שליט"א, וועט פארקומען דינסטאג פרשת עקב ט"ז אב, די קבלת פנים און חופה אין ביהמ"ד טשערנאביל, און די שמחת החתונה אין ביהמ"ד הגדול מאחנובקא בעלזא אין בני ברק.
דער געהויבענער עלטער זיידע פון חתן כ"ק אדמו"ר מפשעווארסק שליט"א וועט זיך מיטפרייען מריחוק מקום, און וועט לויטן פלאן נישט קומען צו פארן קיין ארץ ישראל צו באשיינען די שמחה פערזענליך.
זונטאג פרשת עקב וועט דער וויזניצער רבי ארויספארן אויפן וועג קיין ארץ ישראל, אין באגלייטונג פון הונדערטער חסידים אברכים ובעלי בתים, ועל צבאם ארום הונדערט און פופציג בחורים תלמידי הישיבה הק' אין גיבערס, וואס זענען עוסק די טעג בלימוד שעות רצופות בהתמדה רבה, נאכן מעלדונג פונעם רבי'ן שליט"א אז ווער עס וועט לערנען פיר הונדערט און פופציג שעה ביז צו די נסיעה, וועט האבן די געלעגנהייט מיטצוקומען אויף די נסיעה.
מאנטאג אויפדערנאכט וועט פארקומען א גרויסע מעמד קבלת פנים לכבודו פונעם רבי'ן אין ביהמ"ד אהבת שלום וויזניץ אויף רחוב מלצר אין בני ברק, און דערנאך וועט דער רבי באשיינען די שמחת החתן מאהל אין טשערנאבילער בית המדרש. דינסטאג יום החופה וועט דער רבי פוקד זיין דעם ציון הק' פון אדמור"י בית וויזניץ אין בני ברק, און מיטוואך ממחרת החתונה וועט דער רבי ארויספארן קיין גליל אויף א תפילת רבים אין אתרא קדישא מירון, און פוקד זיין די מקומות הקדושים אין עיה"ק צפת.
דאנערשטאג אויפדערנאכט וועט פארקומען די צענטראלע שבע ברכות אין ביהמ"ד הגדול וויזניץ אין בית שמש, צוגעשטעלט דורכ'ן רבינ'ס ברודער כ"ק אדמו"ר מוויזניץ שליט"א פון בית שמש, שבת קודש וועט דער רבי וויילן אין בני ברק, מיטהאלטן די שמחת השבע ברכות בחצר הקודש טשערנאביל, און אפרעכטן די תפילות, טיש פרייטאג צונאכטס און שלש סעודות, בקרב עדת חסידיו אין בני ברק.
