כ"ק אדמו"ר מוויזניץ שליט"א פון קייאמישע איז היינט צופרי אנגעקומען קיין ארץ ישראל, לקראת די שמחת החתונה פון א אייניקל וואס קומט פאר מארגן דינסטאג בעיר התורה והחסידות בני ברק, שמחת החתונה בחצרות וויזניץ טשערנאביל און פשעווארסק, די חתן א אור אייניקל פון כ"ק אדמו"ר מפשעווארסק שליט"א, און די כלה א טאכטער ביים רבינ'ס איידעם הגה"צ ר' דוד טווערסקי שליט"א, זון פון כ"ק אדמו"ר מטשערנאביל שליט"א.
דער רבי איז ארויסגעפארן אין באגלייטונג פון פילע חסידים, אבער מיט די אפוועזנהייט פון די בחורי הישיבה וועלכע האבן געזאלט מיטקומען אויף די נסיעה, נאכן זיך משלים זיין בלימוד התורה מיט שעות רצופות די לעצטערע חדשים לכבוד די נסיעה. ביז געציילטע טעג צוריק איז נאך געווען אין פלאן אז די בחורים וועלן מיטפארן אויף די נסיעה, אבער צוליב די מלחמה צושטאנד אין ארץ ישראל ווען פילע לופטליניעס האבן אפגערופן רייזעס קיין ארץ ישראל, איז עס נישט צושטאנד געקומען מכח אל הפועל, בעת ווען דער רבי פארשפרעכט צו משלים זיין א באזונדערע נסיעה אינאיינעם מיט די בחורים.
היינט צופרי האט דער רבי געלאנדעט בשערי ארץ הקודש, און תיכף צוגעפארן קיין בני ברק וואו דער רבי וועט האבן די אכסניא אין לויף פון די ביקור המרומם, בבית חתנו הגה"צ ר' דוד טווערסקי שליט"א. די תפילות דורכאויס די ימי הביקור וועט דער רבי דאווענען בהיכל ביהמ"ד אהבת שלום דחסידי וויזניץ אויף רחוב מלצר, און היינט נאך שחרית איז פארגעקומען א מעמד קבלת פנים לכבודו דארט אין ביהמ"ד.
מארגן דינסטאג וועט דער רבי באשיינען על ראש שמחתו, די חתונה קומט פאר אין ביהמ"ד הגדול מאחנובקא בעלזא אין בני ברק, און די קבלת פנים און חופה בבית מדרשו פונעם זיידן כ"ק אדמו"ר מטשערנאביל שליט"א. מיטוואך וועט דער רבי אנקומען קיין בית שמש צום צענטראלן שמחת השבע ברכות פון קהל חסידי וויזניץ בארץ הקודש, בבית מדרשו פונעם ברודער כ"ק אדמו"ר מוויזניץ שליט"א פון בית שמש, דאנערשטאג וועט דער רבי אנקומען אויף א תפילת רבים קיין אתרא קדישא מירון, אין באגלייטונג פון הונדערטער חסידי וויזניץ מארץ ומגולה.
שבת קודש וועט דער רבי באשיינען די שבת של שמחה בחצר הקודש טשערנאביל, די תפילות ליל שבת, טיש פרייטאג צונאכטס און שלש סעודות וועט דער רבי פראווענען אין ביהמ"ד הגדול מודזיץ מיט די באטייליגונג פון פילע וויזניצע חסידים וואס קומען צו פארן מיטהאלטן דעם געהויבענעם שבת. מאנטאג ראה וועט פארקומען די לעצטע שבע ברכות צוגעשטעלט דורכ'ן רבי'ן אין וויזניצע ביהמ"ד אויף רחוב מלצר, און צומארגנס דינסטאג וועט דער רבי זיך אומקערן אהיים למעון קדשו אין ניו יארק.
