חסידי וויזניץ גרייטן זיך מיט עקסטאז צו די ערשטמאליגע שמחת החתונה וואס וועט פארקומען בתוככי קרית מלך רב קרית וויזניץ קייאמישע, ווען עס וועט געפראוועט ווערן די שמחת החתונה פון חתן כלה אייניקלעך ביי כ"ק אדמו"ר מוויזניץ שליט"א פון קייאמישע, אין די גרויסע בנין המוסדות אין קייאמישע לעיק וואס ווערט פראכטפול צוגערישט אין די יעצטיגע טעג.
אין די לעצטע זעקס יאר זינט דער וויזניצער רבי שליט"א איז נתעטר געווארן בכתר האדמורו"ת, פלעגט ער פראווענען די שמחת החתונות אין די משפחה בצל הקודש פון זיין גרויסן שווער כ"ק אדמו"ר הרה"ק מראחמיסטריווקא זי"ע אין בארא פארק, ווען טייל חתונות ווערן אפגעראכטן אין ביהמ"ד הגדול אין שיכון וויזניץ מאנסי, אצינד נאכן הסתלקות פונעם שווער הרה"ק מראחמיסטריווקא זי"ע האבן די עסקני הקהילה זיך אריינגעלייגט בעובי הקורה צו קענען אויסשטעלן די פלענער צו פראווענען די רעבישע חתונות אין שטעטל, און אצינד גרייט מען זיך טאקע אויף די ערשטע חתונה וואס וועט פארקומען בקול צהלה ורנה בקרית מלך רב.
די שמחת החתונה קומט פאר מארגן דינסטאג ד' חשון, די חתן איז א זון פונעם רבינ'ס איידעם הגה"צ ר' מרדכי פנחס טווערסקי שליט"א ראש ישיבת עסק התורה ראחמיסטריווקא, בנו הגדול פון כ"ק אדמו"ר מראחמיסטריווקא שליט"א, און די כלה איז א טאכטער פונעם רבינ'ס זון הגה"צ ר' יעקב יוסף האגער שליט"א, איידעם ביי כ"ק אדמו"ר מקאסאני שליט"א, איידעם ביי הרה"ק בעל תורת מרדכי מוויזניץ זי"ע.
די גרויסע חתונה וועט פארקומען אין א גרויסע וועירהאוז אויף די רוט 42 ממש נעבן די וויזניצע שטעטל, א ריזיגע געביידע וואס די הנהלת המוסדות אין קייאמישע האט אפגעקויפט מיט עטליכע יאר צוריק, און דינט אלס צענטראלע אפיס פאר די מוסדות און נאך עטליכע באדערפענישן ווי סטארעדזש וכדו'. די חתונה פאר די פרויען וועט פארקומען אין ביהמ"ד הגדול אין שטעטל, און די מעמד החופה וועט פארקומען אויפן ריזן פארקינג לאט פארנט פון ביהמ"ד.
דעם שבת קודש פרשת נח איז פארגעקומען די שמחת האויפרוף אין בארא פארק, בצל הקודש פונעם געהויבענעם זיידן כ"ק אדמו"ר מראחמיסטריווקא שליט"א, דער דאפלטער זיידע דער וויזניצער רבי האט געוויילט אויף שבת אין בארא פארק לכבוד די שמחה, און געפראוועט די תפילות און טישן אין ביהמ"ד הגדול ראחמיסטריווקא אינאיינעם מיטן שוואגער דער ראחמיסטריווקא רבי שליט"א. פרייטאג צונאכטס האט דער רבי געדאווענט אינאיינעם מיטן פלומעניק כ"ק אדמו"ר מוויזניץ שליט"א פון בארא פארק, און שלש סעודות האט דער רבי געפראוועט אינאיינעם מיטן ברודער כ"ק אדמו"ר מוויזניץ שליט"א פון ירושלים.
דעם קומענדיגן שבת וועט פארקומען די שבת שבע ברכות אין קרית וויזניץ קייאמישע, וואו עס איז ערווארטעט דער געהויבענער זיידע כ"ק אדמו"ר מראחמיסטריווקא שליט"א, ואתו עמו א שיינע ציבור חסידים פון נאנט און ווייט.
