א זעלטן שיינער מעמד איז פארגעקומען די וואך בחצרות בית וויזניץ, ווען טויזנטער וויזניצער חסידים פון איבער גרעיטער ניו יארק און ניו דזשערסי האבן זיך צוזאמגענומען בשבת אחים גם יחד צו פייערן די חגיגה לכבוד התורה, סיום מסכת ברכות והתחלת סדר מועד, במסגרת הלימוד מאמר מרדכי דחסידי וויזניץ, לזכר נשמתו פונעם געטרייען מנהיג כ"ק אדמו"ר הרה"ק בעל תורת מרדכי מוויזניץ זי"ע.
דער מעמד איז פארגעקומען אויף אן ערשטמאליגן פארנעם אין דעם נייעם פראכטפולן עטרת ווערטהיימער זאל אין דעם המספיק רעזארט אין די קאנטרי בערג, ווען אין שפיץ פון די פיל מסובים באשיינען די ראשי העדה, כ"ק האחים האדמורי"ם מוויזניץ שליט"א פון מאנסי, קייאמישע, וויליאמסבורג, ירושלים, לאנדאן, מאנטריאל, און בארא פארק. ווען דערנעבן זיצן די שוואגערס הרבנים און פיל רבנים ומורי הוראה רבני הקהילות.
דער גיגאנטישער זאל איז געווען פול געפאקט מלא על גדותיו, מיט וויזניצער חסידים פון אומעטום וועלכע זענען געקומען צו פארן מיטהאלטן די זעלטענע כנסיה, צי פון די קאנטרי בערג, פון מאנסי און ווייטער אראפ וויליאמסבורג און בארא פארק.
דער יושב ראש המעמד איז געווען הרב ישכר דוב ראזענפעלד שליט"א מנהל בתלמד תורה וויזניץ מאנסי, מיט דער פתיחת המעמד האט אויפגעטראטן הרה"ג ר' דוד שלמה יונגרייז שליט"א ר"ם בישיבת וויזניץ אין בארא פארק, בן כ"ק אדמו"ר מגארליץ שליט"א. דערנאך האט הנדיב הנכבד ר' אברהם חיים שאמועל הי"ו וועלכער לערנט אליין פאר א שיעור במסגרת מאמר מרדכי אין בית המדרש הגדול וויזניץ אין וויליאמסבורג, געמאכט דעם סיום מסכת און אויפגעטראטן מיט עטליכע ווערטער לכבוד דעם מעמד.
דער זקן החסידים הרה"ח ר' פינחס ניימאן הי"ו ראש הקהל וויזניץ וומס"ב האט געזאגט קדיש, און הגה"צ אבד"ק ראחמיסטריווקא מאנסי שליט"א עלטסטער איידעם ביי הרה"ק מוויזניץ זצ"ל האט אנגעהויבן די נייע מסכת, די ערשטע משנה אין מסכת שבת. דאן האט מען זיך ארויסגעלאזט אין פייערליכע ריקודין פאר א לענגערע צייט.
דערנאך האט אויפגעטראטן דער נואם הכבוד כ"ק אדמו"ר מוויען שליט"א, וועלכער איז נתכבד געווארן דורך א פערזענליכן רוף פונעם גדול האחים כ"ק אדמו"ר מוויזניץ שליט"א פון מאנסי בשליחות פון אלע ברידער האדמורי"ם. דער רבי שליט"א האט מעלה געווען די מעלות פון לימוד התורה בכלל, און לימוד בחבורה בפרט, און די מעלה נוספת פון מאמר מרדכי וואס דאס טוט מקשר זיין דעם ציבור מיט דעם רבי'ן זצ"ל. בסוף דבריו האט דער רבי שליט"א מציע געווען אז די עלטערן זאלן מעודד זיין די בחורים זאלן אנהייבן לערנען דעם לימוד פון מאמר מרדכי.
צום שלוס האט כ"ק אדמו"ר מוויזניץ שליט"א פון מאנסי אויפגעטראטן מיט דברות קודש, אנהייבנדיג אז ער רעדט ברשות ובשליחות פון אלע ברידער האדמורי"ם. נאכ'ן מאריך זיין במעלות לימוד התורה, און שיינע עובדות וסיפורים פון אביו הרה"ק מוויזניץ זצ"ל, האט ער ארויסגעברענגט די מעלות החבורה מאמר מרדכי, וואס אלע פרטים דערפון ווערן ארויפגעברענגט על שולחן מלכים. און זענען בהסכמת כ"ק האדמורי"ם שליט"א. דער רבי שליט"א האט מעלה געווען בשבח פון בן אחיו הרה"ג רבי ברוך האגער שליט"א בן כ"ק אדמו"ר מוויזניץ שליט"א פון מאנטריאל, וועלכער שטייט אין שפיץ פון דער הייליגער חבורה, און ארויסגעברענגט אז ער איז א מוסר השכל ארויפצוקוקן וואס איינער מיט א שטארקן רצון קען אלץ אויפטון. און צום סוף אפעלירט פאר גאנץ בית וויזניץ, אפילו די וועלכע האבן שוין אנדערע לימודים, זיך אנצושליסן אין דעם מסגרת מאמר מרדכי.
דער וויזניצער רבי פון וויליאמסבורג איז מכובד געווארן מיט'ן בענטשן, דער וויזניצער רבי פון קייאמישע מיט ברכות ראשונות, און דער וויזניצער רבי פון ירושלים מיט ברכה אחריתא.
