חסידי וויזניץ אין שטאט אשדוד זענען איינגעהילט אין א יום טוב'דיגע שטימונג, ווען היינט זונטאג האבן זיי געהאט די זכיה צו מקבל זיין את פני הקודש פון כ"ק אדמו"ר מוויזניץ שליט"א, וועלכער איז אנגעקומען אויף א לענגערע באזוך בקרב חסידיו אין שטאט.
דער רבי שליט"א וועט זיך אויפהאלטן אין אשדוד די קומענדיגע דריי וואכן, ווען אין לויף פון די טעג וועט דער רבי אויפנעמען כלל חסידיו מיט קוויטלעך, און געזעגענען דעם ציבור אויף א פערזענליכע פארנעם, אריינגערעכנט די תפילות אין די וואכן טעג וואס דער רבי וועט דאווענען בבית האכסניא מיט די באטייליגונג פון די חסידים תושבי העיר.
די קומענדיגע שבת פרשת אמור וועט געפראוועט ווערן אויף א פריוואטע פארנעם בבית האכסניא אין די ניינטע קווארטל אין אשדוד, דאנערשטאג פרשת בהר וועט פארקומען א גרויסע מעמד קבלת פנים ברחובה של עיר אין די זיבעטע קווארטל, און דערנאך וועט דער רבי פארבלייבן דארט אין רובע ז' בבית האכסניא ביי הרב החסיד ר' שלמה שעכטער הי"ו.
שבת פרשת בהר וועט זיין א גרויסע שבת אין די זיבעטע קווארטל, די תפילות און טישן וועלן פארקומען אינעם גרויסן זאל נעבן די גערער סעמינאר אויף רחוב רבי טרפון. שלש סעודות וועט געפראוועט ווערן אויף א פארמאכטע פארנעם, און מוצאי שבת וועט פארקומען א גרויסע מעמד הדלקה בליל ל"ג בעומר.
די דריטע שבת פרשת בחוקותי, וועט זיין געאייגענט בלויז פאר די חסידים תושבי אשדוד, און וועט געפראוועט ווערן אין ביהמ"ד דחסידי וויזניץ אין שטאט. זונטאג דערויף וועט פארקומען די מעמד הנחת אבן הפינה פאר די נייע בנין התלמוד תורה אין רובע ח'.
